Дар Донишкадаи тиббӣ - иҷтимоии Тоҷикистон 3218 нафар донишҷӯ таҳсил менамояд, ки аз ин шумора 125 нафаро донишҷӯёни хориҷӣ ташкил медиҳанд. Шумораи донишҷӯёни хориҷӣ дар соли 2025 64 нафар зиёд гардиданд.

Дар ин хусус имрӯз - 6 август Зарина Ибодзода, ректори Донишкадаи тиббӣ - иҷтимоии Тоҷикистон зимни нишасти матбуотӣ иттилоъ дод.

Зикр гардид, ки дар Донишкада донишҷӯёни хориҷӣ аз давлатҳои Ҳиндустон, Покистон, Бангладеш, Малави, Танзания, Арабистони Саудӣ ва Нигерия таҳсил мекунанд.

Донишкада бо 51 муассисаи тиббӣ ва профлактикии шаҳри Душанбе шартномаи ҳамкорӣ дошта, донишҷӯёни донишкада дар ин муассисаҳо таҷрибаи амалии тиббӣ мегиранд.

Натиҷаҳои тақсимоти даври якуми қабули довталабон ба донишгоҳу донишкадаҳои олии мамлакат дар соли 2025 нишон дод, ки нақшаи қабул дар Донишкадаи мазкур 98 % иҷро гардидааст. Яъне, дар айни замон 878 нафар довталабон донишҷӯи донишкадаи мо шудаанд, гуфт Зарина Ибодзода.

Дар охир зикр гардид, ки дар назди Донишкада Маркази клиникии илмӣ -таълимӣ фаъолият менамояд, ки аксари донишҷӯён дар он ба таҷрибаомӯзӣ фаро гирита мешаванд.

М. МУҚАДДАМОВА, “ҶТ”