Дар Ҷумҳурии Тоҷикистон 4037 муассисаҳои таҳсилоти умумӣ бо фарогирии 2 357 056 нафар хонанда фаъолият менамояд, ки дар онҳо 130 732 нафар омӯзгор ба таълиму тарбияи насли наврас машғул аст.

Ин нукта дар нишасти матбуотии Агентии назорат дар соҳаи маориф ва илми назди Ҳукумати Ҷумҳурии Тоҷикистон 31 июли соли 2025 иброз гардид.

Тавре Муҳаммадтоир Саидзода, директори Агентӣ иттилоъ дод, дар нимсолаи аввали соли ҷорӣ дар миқёси ҷумҳурӣ аттестатсияи давлатии 420 муассисаи таҳсилоти умумӣ, аз ҷумла 4 муассисаи таҳсилоти умумии дорои мақоми ҷумҳуриявӣ, ғайридавлатӣ ва назди вазорату идораҳо ва 416 муассисаи таҳсилоти умумии дорои мақоми маҳаллӣ гузаронида шуд. Дар натиҷа якчанд омилҳо ҳамчун мушкилот боиси ба талабот ҷавобгӯ набудани сифати таҳсилот дар муассисаҳои таҳсилоти умумӣ номбар карда шуданд, ки инҳо норасоии китобҳои дарсӣ аз рӯи фанҳои таълимӣ, аксар вақт ба дарс наовардани китобҳои дарсӣ аз ҷониби хонандагон, набудани самараноки дар машғулиятҳои таълимии омӯзгорон, норасоии воситаҳои аёнӣ, методикаи нави таълим, норасоии кадрҳо, ғайри ихтисоси фаннӣ фаъолият намудани омӯзгорон, ҷалби донишҷӯёни шакли таҳсили рӯзона дар муассисаҳои таълимӣ, теъдоди аз меъёр зиёди хонандагон дар аксар синфҳои муассисаҳои таълимӣ (камтарин дар як синф 29 ва аз ҳама зиёд то 53 нафар), номуназзамии ташкили корҳои инфиродӣ ва мустақилонаи хонандагон, бахусус дар самти кор бо хонандагони сустхон ва душвортарбия, риоя накардани меъёри баҳогузорӣ аз ҷониби омӯзгорон, истифода нашудани тахтаҳои электронӣ аз ҷониби омӯзгорони фаннӣ, таъин набудани озмоишгоҳҳои фаннӣ бо маводи озмоишӣ, дуруст ба роҳ намондани корҳои амалӣ дар лабораторияҳо ва ғайраҳо мебошанд.

Ҳамчунин, дар ин давра аттестатсияи давлатии 13 муассисаи таълимӣ ва 59 муассисаи таҳсилоти томактабӣ гузаронида шуд.

Санҷишҳо муайян намудаанд, ки мушкилоти асосӣ дар зинаи таҳсилоти томактабӣ низ ин норасоии кадрҳо ( хоса дар маҳалҳо) ва фаъолияти ғайриихтисоси мураббияҳо мебошад.

Шаҳло ЭШОНОВА, “ҶТ”