Бахшида ба эълон гардидани солҳои 2025-2030 Солҳои рушди иқтисоди рақамӣ ва инноватсия моҳи майи соли 2025 бори нахуст миёни донишҷӯёни муассисаҳои таҳсилоти олии касбии Ҷумҳурии Тоҷикистон Озмуни ҷумҳуриявии “Ҷоми ректори Донишгоҳи давлатии омӯзгории Тоҷикистон ба номи Садриддин Айнӣ” таҳти унвони “Дизайнер ва барномасози беҳтарин” баргузор гардид.

Дар ин хусус Ибодуллозода Аҳлиддин, ректори Донишгоҳи давлатии омӯзгории Тоҷикистон ба номи С. Айнӣ санаи 22 июли соли равон зимни нишасти матбуотӣ иттилоъ дод.

Гуфта шуд, ки озмун аз рӯи 4 бахш: “Барномасозӣ бо татбиқи забонҳои муосири барномасозӣ”; “Рақамикунонӣ ва иқтисодиёти рақамӣ”; “Дизайнер ва сомонасозӣ бо татбиқи технологияи муосир”; “Ихтироот ва навоварӣ” доир гардида, мақсад аз роҳандозӣ намудани он фароҳам овардани имконият барои донишҷӯёни болаёқат ҷиҳати пешниҳоди маҳорату дониши худ ва ба ин восита пайдо намудани ҷавонони дизайнер ва барномасоз мебошад.

Ҳамзамон таъкид гардид, ки Донишгоҳ бори нахуст аз ҷониби Ассотсиатсияи таҳсилоти олии Чини Созмони Ҳамкории Шанхай ва Маркази хизматрасонии Чин оид ба табодули байналмилалии илмии назди Вазорати маорифи Ҷумҳурии Мардумии Чин аз аккредитатсияи байналмилалии институтсионналӣ гузаронида шуд.

Шаҳло ЭШОНОВА, “ҶТ”