Президенти Ҷумҳурии Тоҷикистон муҳтарам Эмомалӣ Раҳмон ба як қатор сохторҳои дахлдор дастур доданд, ки барои пешгирии офатҳои табиӣ дар кишвар чораҳои заруриро андешанд.

Дар ин бора Хадамоти матбуоти Президенти кишвар иттилоъ дод.

Манбаъ менавсиад, ки рӯзи 10 май Сарвари давлат ба Сарвазири мамлакат, роҳбарони вазорату идораҳои дахлдор, раиси Вилояти Мухтори Кӯҳистони Бадахшон, раисони вилоятҳои Суғду Хатлон ва шаҳру ноҳияҳо дастур доданд, ки доир ба пешгирӣ ва бартараф намудани оқибатҳои офатҳои табиӣ, ба мисли боронҳои шадиду селу ҷола, обхезӣ ва сангрезиш дар роҳҳои кӯҳӣ чораҳои зарурӣ амалӣ намуда, мардумро аз ин хатарҳо огоҳ намоянд.

Ҳамзамон, таъкид гардид, ки имрӯз ва чанд рӯзи наздики дигар дар минтақаҳои гуногун, бахусус ноҳияҳои кӯҳӣ ва наздикӯҳӣ обу ҳавои номусоид ва офатҳои табиӣ пешбинӣ мегардад.