То аввали моҳи июли соли 2026 дар Тоҷикистон 3959 нафар беморони нашъаманд дар қайди муассисаҳои наркологӣ қарор доштаанд. Ин рақам нисбат ба ҳамин давраи соли гузашта 43 нафар ё 1,1 дарсад камтар аст. Дар ин бора имрӯз Самад Зафар, директори Агентии назорати маводи нашъаовар зимни нишасти матбуотӣ хабар дод.

- Бино ба омори Вазорати тандурустӣ ва ҳифзи иҷтимоии аҳолии Тоҷикистон, аз шумораи умумии беморони дар қайд буда 111 нафарро занон ташкил медиҳанд. Соли гузашта ин нишондод 108 нафар буд,-илова кард С. Зафар.

Ҳамзамон, 993 нафар, ё тақрибан чоряки беморони нашъаманди дар қайдбуда, аз маводи мухаддир бо роҳи тазриқӣ истифода мебурдаанд.

Дар шаш моҳи аввали соли ҷорӣ 231 нафар бори аввал бо ташхиси “нашъамандӣ” дар муассисаҳои наркологии кишвар ба қайд гирифта шудаанд.

Тибқи маълумоти расмӣ, дар ҳамин давра 40 нафар беморони нашъаманд, аз ҷумла як зан, фавтидаанд. Аз ин миён, танҳо як ҳолати марг бар асари аз меъёр зиёд истеъмол кардани маводи мухаддир (передозировка) сабт шудааст.

Мақомоти тандурустӣ мегӯянд, ҳоло дар Тоҷикистон ба ҳар 100 ҳазор нафар аҳолӣ 39,6 нафар бемори нашъаманд рост меояд. Ба гуфтаи масъулон, ин нишондиҳанда нисбат ба бисёре аз кишварҳои дигар паст арзёбӣ мешавад.

Яҳё МАҲМАДНАБИЕВ, “ҶТ”