Имрӯз зимни нишасти матбуотии ҶСК "Барқи тоҷик" масъалае, ки тайи чанд рӯзи охир дар шабакаи иҷтимоии Фейсбук ба вуҷуд омадааст, мавриди баррасӣ қарор гирифт.

Шаҳрвандони зиёде шикоят аз паёмаке мекунанд, ки аз ҷониби ҶСК "Шабакаҳои тақсимоти барқ" ба онҳо равона шудааст. Мувофиқи ин шикоятҳо шаҳрвандон даъво доранд, ки ба унвонии онҳо қарзҳои чанд сол пеш, ки худ низ аз он огаҳӣ надоранд, аз ҷониби ин ниҳод ба номашон сабт карда шуда, аз шаҳрвандон талаб карда шудааст, ки маблағи зикркардашударо пардохт намоянд. Дар сурати пардохт накардани маблағҳои зикргардида барқи онҳо қатъ карда хоҳад шуд.

Дар ҷараёни нишаст намоянда аз ҶСК "Шабакаҳои тақсимоти барқ" масъалаи мазкурро шарҳ дода, гуфт: “Се сол мешавад, ки дар шаҳри Душанбе системаи биллингӣ фаъолият мекунад. Ин система пеш аз ин вақте дар шаҳри Хуҷанд ба истифода оғоз кард, тамоми қарзҳои пешинаи шаҳрвандон пеш аз оғози он пардохт карда шуд. Вақте ин система дар шаҳри Душанбе ба фаъолият даромад, мо қарзҳои пешинаи шаҳрвандонро ба баррасӣ қарор додем. Айни замон зиёда аз 40 млн. сомонӣ қарз ҳам аз ҳисоби корхонаҳо ва ҳам 50 000 шаҳрвандон аз се соли пеш боқӣ мондааст. Мо хостем ин қарзҳоро ба система ворид созем, аммо аз сабаби он ки дурустии онҳо дақиқ нест, бинобар ҳамин тасмим гирифтем, аввал ба 10 000 шаҳрванд бо муҳлати муайян паёмак равон намоем, то онҳо ба шабакаҳои тақсимоти барқ дар шаҳр муроҷиат карда, аз дурустӣ ё нодурустии қарзи худ огаҳӣ пайдо намоянд”.

Номбурда дар идома қайд кард, ки шаҳрвандонро мебояд тули муддати ба онҳо таъиншуда ба шабакаҳои тақсимоти барқи шаҳри Душанбе муроҷиат намоянд. Шояд қарзи ба номи онҳо сабтшуда нодуруст бошад.

- Агар қарзи дар номи онҳо сабтшуда дуруст бошад, қарзро месупоранд, агар не қарзи мазкур хат зада хоҳад шуд, - гуфт номбурда.