13 декабр дар шаҳри Душанбе Чемпионати Ҷумҳурии Тоҷикистон оид ба гӯштини тарзи озод ва гӯштини юнону-римӣ байни калонсолон ба таври расмӣ оғоз гардид. Ин мусобиқаи муҳими варзишӣ бо иштироки беҳтарин паҳлавонони кишвар баргузор шуда, ба яке аз рӯйдодҳои муҳими тақвими варзишии ҷумҳурӣ табдил ёфтааст.

Маросими ифтитоҳи чемпионат дар фазои тантанавӣ баргузор гардида, дар он Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Ҷамшед Машрабзода, Президенти Федератсияи гӯштини юнону-римии Ҷумҳурии Тоҷикистон, Амирҷон Иброҳимзода, ректори Донишкадаи тарбияи ҷисмонии Тоҷикистон ба номи Саидмумин Раҳимов, инчунин, Муҳаммадшо Абдуллозода, котиби генералии Кумитаи миллии олимпии Тоҷикистон иштирок ва суханронӣ намуданд. Зимни баромадҳо таъкид гардид, ки гӯштин яке аз риштаҳои афзалиятноки варзиш дар кишвар буда, баргузории чунин чемпионатҳо ба рушди он такони ҷиддӣ мебахшад.

Мусобиқа аз рӯи ду равия - гӯштини тарзи озод ва гӯштини юнону-римӣ (Greco-Roman) доир гардида, дар он паҳлавонон аз тамоми минтақаҳои ҷумҳурӣ ширкат доранд. Рақобатҳо хеле ҷолиб ва шадид ҷараён гирифта, ҳар як варзишгар кӯшиш кард, то маҳорати баланд ва омодагии ҷиддии худро нишон диҳад.

Қобили зикр аст, ки чемпионат рӯзҳои 13–14 декабр дар Маҷмааи варзишии Донишгоҳи миллии Тоҷикистон, воқеъ дар шаҳри Душанбе, баргузор гардида, дар ҷараёни мусобиқа қувваозмоиҳо аз рӯи ҳамаи категорияҳои вазнӣ миёни варзишгарони калонсол сурат гирифт.

Ҳадафи асосии баргузории Чемпионати Ҷумҳурии Тоҷикистон оид ба гӯштин рушди минбаъдаи ин риштаи варзиш дар кишвар, баланд бардоштани сатҳи маҳорати касбии паҳлавонон, дарёфти истеъдодҳои нав ва интихоби беҳтарин варзишгарон барои шомил гардидан ба ҳайати дастаи мунтахаби миллӣ мебошад. Инчунин, чунин мусобиқаҳо барои омодагии варзишгарон ба мусобиқаҳои байналмилалӣ заминаи мусоид фароҳам меоранд.

Яҳё МАҲМАДНАБИЕВ, “ҶТ”