28 феврали бо ташаббуси Иттифоқи журналистони Тоҷикистон, ҳудуди 30 нафар намояндагони ВАО аз бинои маъмурии Кумитаи иҷроияи марказии Ҳизби Халқии Демократии Тоҷикистон боздид карданд. Намояндагони ВАО-ро роҳбарияти ҲХДТ ва кормандони нашрияҳои “Минбари халқ” ва “Мароми пойтахт” гарму самимӣ истиқбол карда, онҳоро бо шароити кор дар бинои тозабунёд ошно карданд.

Бинои маъмурии ҲХДТ, ки 10 апрели соли 2025 бо иштироки бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси ҲХДТ муҳтарам Эмомалӣ Раҳмон ифтитоҳ гардида буд, дорои ҳуҷраҳои муҷаҳҳаз, аз ҷумла осорхона, толори маҷлис, китобхонаи электронӣ, ошхона ва дигар иншооти ёрирасон мебошад. Шароити фароҳамшуда ба кормандони ҳизбӣ имкон медиҳад, ки фаъолиятро дар сатҳи баланд ба роҳ монанд ва чорабиниҳои сиёсиву ҷамъиятиро бо сифати беҳтар баргузор намоянд.

Дар оғози боздид намояндагони ВАО аз осорхонаи ҲХДТ дидан карданд. Осорхона бахшида ба 35-умин солгарди таъсисёбии Ҳизб таъсис ёфта, аз ҷониби Пешвои миллат ба истифода дода шудааст. Осорхона аз 15 бахш иборат буда, ҳар бахш фаъолияти ҳизбӣ, дастовардҳои миллӣ ва корномаҳои муҳим дар рушди давлатдории Тоҷикистонро муаррифӣ мекунад.

Дар осорхона маводҳои гуногуни таърихӣ ҷамъоварӣ шудаанд: аксҳо, матнҳо, ҳуҷҷатҳои расмӣ, маводҳои чопӣ ва нашрияҳои ҳизбӣ. Дар осорхона аввалин нашрияи "Минбари халқ” низ ҷой дода шудааст. Ин нашрия бо қарорҳо ва санадҳои муҳим дар осорхона пешниҳод шудааст, ки фаъолияти ҳизбӣ ва сиёсати ҷамъиятии Тоҷикистонро нишон медиҳад. Намояндагони ВАО тавассути тамошои аксу ҳуҷҷатҳо ва маводи осорхона бо давраҳои гуногуни давлатдории тоҷикон ва дастовардҳои Ҳизб шинос шуданд. Инчунин, осорхона имконият медиҳад, ки рушди иҷтимоӣ, иқтисодӣ ва фарҳангии Тоҷикистон аз даврони таъсисёбӣ то имрӯз ба таври визуалӣ намоиш дода шавад. Тамошои мавод ба меҳмонон имкон дод, ки роҳи тайкардаи давлатдориро аз солҳои аввалини соҳибистиқлолӣ то имрӯз бо чашми худ бубинанд. Баъдан, намояндагони ВАО аз маҷлисгоҳҳои бино дидан карданд. Тамоми маҷлисгоҳҳо бо таҷҳизоти муосир – низоми садо ва равшанӣ, экранҳои намоишӣ ва шароити бароҳат барои баргузории конфронсҳо ва нишастҳо муҷаҳҳаз гардидааст.

Сипас, Маликшоҳ Неъматзода, муовини якуми раиси ҲХДТ бо намояндагони ВАО мулоқот кард. Неъматзода фаъолияти Ҳизб, дастовардҳои даврони соҳибистиқлолӣ, шароитҳои фароҳамовардаи Пешвои миллат барои кормандони ҳизбӣ ва муҳимияти осорхона ва маҷлисгоҳро ба таври мушаххас шарҳ дод.

Зиннатуллоҳ Исмоилзода, раиси Иттифоқи журналистони Тоҷикистон низ зимни суҳбат қайд кард, ки ҳадафи боздид шиносоӣ бо шароити нави фароҳамовардаи корӣ, тақвияти ҳамкориҳо ва дастгирии сиёсати созандаи Пешвои миллат мебошад. Ӯ гуфт, ки намояндагони ВАО дар ин мулоқот имконият пайдо карданд, ки бо фаъолияти ҳизбӣ, дастовардҳои даврони соҳибистиқлолӣ ва шароити фароҳамовардаи ҲХДТ дар пойтахт шинос шаванд.

Малика МУҚАДДАМОВА, “ҶТ”