Шоми 14-уми август дар Муассисаи давлатии “Аҳорун” ба ифтихори ҷоизадорони Бозиҳои олимпии Париж-2024 ва ба хотири арҷ гузоштан ба корнамоиҳои варзишгарони кишвар дар арсаи байналмилалӣ, барномаи бошукӯҳи фарҳангӣ баргузор гардид.

Дар оғози чорабинӣ Дилбар Одилзода, муовини раиси шаҳри Душанбе аз номи Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе Рустами Эмомалӣ ҷоизадоронро табрик намуда, иброз дошт, ки варзиш яке аз воситаҳои муҳими ташвиқи тарзи ҳаёти солим буда, омили ташаккулдиҳандаи неруву тавоноии инсон ва муаррификунандаи кишвар ва халқу миллат дар арсаи ҷаҳонӣ ба ҳисоб меравад.

Дар идома ҳамчунин Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон низ суханронӣ намуда, иброз дошт, ки тадбирҳои шоиста дар самти таҷдиду азнавсозӣ ва бунёду ба истифода додани маҷмааву варзишгоҳҳо дар тамоми манотиқи мамлакат нишони таваҷҷуҳи ҳамешагии Роҳбари давлат ба ин самт мебошанд.

“Таъсиси Ҷоизаи Президенти Ҷумҳурии Тоҷикистон барои ғолибон ва ҷоизадорони мусобиқаҳои байналмилалӣ ва эҳёи намудҳои варзиши миллӣ нишони он аст, ки дастгирӣ ва рушд бахшидани соҳаи варзиш як қисми сиёсати ҷавонпарваронаи Пешвои муаззами миллатро ташкил медиҳад”, – гуфт Зулфиқор Гулаҳмадзода.

Пас аз суханронӣ қисмати фарҳангии чорабинии мазкур оғоз гашта, дар он баҳри болидаруҳии меҳмонон ва ҳозирин барномаи консертии диданӣ намоиш дода шуд.