Ин мисраи шеъриро дар охирсухани худ Қубонсултон Алидодова ҳамчун меҳрномаи кулли ҷавондухтарони Бадахшонзамин зимни суҳбат ба Пешвои миллат муҳтарам Эмомалӣ Раҳмон эҳдо намуд.

Ӯ дар як деҳаи хурдакаки Шоди водии Шоҳдара таваллуд шудаву дар ин ҷо, мобайни кӯҳҳои сарбафалак ба воя расидааст. Чун уқоби баландпарвоз боғайрату боғурур. Аммо ғурури ӯ танҳо ғурури ватандӯстист. Зеро дар оилае ба воя расидааст, ки ҳамеша дар муҳити он оҳанги ватандӯстӣ танинандоз аст.

Орзуҳои қаҳрамони ин сатрҳо вақте амалӣ шудан гирифтанд, ки ӯ баробари хониши хубу аъло, дар роҳи интихобкардаи падараш гом ниҳод. Устуворона, бебокона ва чолокона. Ҳарчанд баъзе ба ин зид буданд, вале духтараки хурдсол ҳамеша орзуи варзишгар шуданро дар дилаш мепарварид. Билохира, орзуяш ҷомаи амал пӯшиду ба роҳи падар раҳсипораш кард. Дар мусобиқаҳо иштирок мекард ва муваффақият пайиҳам насибаш мегардид. Аммо ҳеҷ гумон надошт, ки замоне, заҳматҳояш ӯро бо шахсияте рӯ ба рӯ хоҳад кард, ки тақдири минбаъдаашро куллан тағйир медиҳад.

Бале, ин мулоқот бо Қаҳрамони Тоҷикистон, фарзанди фарзонаи миллат, Сарвари раиятпарвару ғамхори мардум муҳтарам Эмомалӣ Раҳмон буд, ки соли ҷорӣ зимни сафари корӣ ба ноҳияи Роштқалъа иттифоқ афтод.

Баъди суханронии пурмуҳтавои Роҳбари давлат, Қурбонсултон Алидодова аз миёни мардуми дар толор нишаста ба назди минбар омад.

- Марҳамат духтарам, - гуфтанд Пешвои миллат.

“Дуруду саломи бепоён, Ҷаноби Олӣ, эй раҳнамои халқи тоҷик, корвонсолори ваҳдати миллӣ, Пешвои миллат!

Ман, Алидодова Қурбонсултон, муҳассили мактаби миёна, барандаи ҷоизаи ифтихории даври ҷумҳуриявии озмуни “Фурӯғи субҳи доноӣ китоб аст” дар номинатсияи эҷоди назму наср, чемпиони чандинкаратаи Ҷумҳурии Тоҷикистон аз намудҳои каратэ годзю -рю ва муай тай, барандаи медали биринҷии мусобиқаи ҷумҳуриявӣ ва мусобиқаи байналхалқӣ аз намуди таэквондо, дорандаи унвони “Устоди варзиши Ҷумҳурии Тоҷикистон” мебошам.

Пешвои муаззами миллат!

Бароям ин рӯз беҳтарин лаҳзаи зиндагии ман аст, зеро имкон пайдо кардам, то дар рӯ ба рӯ бо Сарвари маҳбуби кишварам суханронӣ намоям.

Мо дар хона 5 нафар ҳастем ва шиори хонаводагии мо суханони пурмуҳтавои Шумо, Ҷаноби Олӣ: “Ақли солим дар ҷисми солим” аст. Мо ҳамаи фарзандон бо падарамон дорандагони унвони “Устоди варзиши Ҷумҳурии Тоҷикистон” мебошем. Худро чун як ҷинси латиф хушбахт меҳисобам, ки таҳти ҳидоятҳо ва дастгириҳои падаронаи Шумо имкон дорам, дониш ва маҳорату истеъдодамро баробари бачаҳои ҳамсолам дар майдонҳои варзиш ва илму дониш дар маърази имтиҳон қарор диҳам.

Ташкил ва баргузор намудани озмунҳои мухталиф аз ҷониби Шумо, Ҷаноби Олӣ, заминаи воқеии падид омадани истеъдодҳои нав ба нав миёни қишрҳои гуногуни ҷомеа гардида, ғамхорӣ ва дастгирии пайвастаи Шумо аз варзишгарон боиси ифтихор аст. Ғолибияти варзишгарони мо дар Олимпиадаи имсола шаҳодати он аст, ки мо миллати ғаюру шуҷоъ, ватандӯсту ватанпарвар буда, ҳеҷ гоҳ намегузорем, ки Парчами миллати мо аз осмонҳо бар замин фурӯд ояд.

Ман аз номи худам ва аз номи ҳамаи ҷавондухтарони ноҳия Шуморо бовар мекунонам, ки мо дар куҷое ё дар кадом ҷодае, ки набошем, ҳамеша таҳти ҳидоятҳои падаронаи Шумо кору фаъолият карда, баҳри ободии Ватани азизи хеш ва баланд бардоштани номусу ифтихори миллати худ дар арсаҳои гуногуни зиндагӣ сайю талош хоҳем кард”.

Бале, ин суханони шакарбори духтари кӯҳистоние буд, ки аз қалб барои Роҳбари давлат ироа намуданд. Суханони пур аз меҳру муҳаббат, садоқату ватандорӣ.

- Аҳсан, духтарам, - бо самимият гуфтанд Пешвои миллат баъди суханронии қаҳрамони ин сатрҳо.

Ӯ бошад, дар ҷавоб ба ғамхориҳои падаронаи Пешвои раиятпарвару мардумдӯсти миллат фарзандона таманно намуд:

Ало, эй Пешвои миллати олитабори мо,
Ало, эй дар ҳама андӯҳу сахтӣ ғамгусори мо.
Илоҳо, ҳар куҷо бошӣ, Худо бошад мададгорат,
Худо дар ҳар куҷо бошад анису ёвару ёрат.
Ту бошиву баҳори бахти тоҷик гулфишон бошад.
Канорат Тоҷикистони азизи мо амон бошад.

Вақте ки мавод омодаи чоп гардид, бо дастури Пешвои миллат Қурбонсултон Алидодова дар шаҳри Душанбе бо манзили зист таъмин ва донишҷӯи Донишгоҳи техникии Тоҷикистон ба номи М. Осимӣ гардидааст.

Чунин аст ғамхории падаронаи Роҳбари давлат нисбати мардуми тоҷик. Зиҳӣ Пешвои маҳбуби миллат.

Садоншо ҶАНОБИЛШОЕВ, “ҶТ”