Дар Тоҷикистон дар шаш моҳи аввали соли ҷорӣ 30 ҳазору 356 ҳолати бақайдгирии ақди никоҳ сабт шудааст, ки ин нисбат ба ҳамин давраи соли гузашта 78 ҳолат кам аст (соли 2024-ум 30 434 ҳолат).

Дар ин бора Бунафша Файзиддинзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон 1 август зимни нишасти хабарӣ иттилоъ дод.

Номбурда ҳамчунин таъкид дошт, ки бекоршавии ақди никоҳ низ дар ин давра коҳиш ёфтааст. Дар шаш моҳи аввали соли равон бекоршавии ақди никоҳ 4 ҳазору 117 ҳолатро ташкил медиҳад, ки нисбати соли гузашта 291 ҳолат кам ба қайд гирифта шудааст.
Дар пайи бекор гардидани ақди никоҳ дар ин давра 3 ҳазору 632 кӯдакони ноболиғ дар тарбияи яке аз волидон мондаанд. Ин шумора нисбати ҳамин давраи соли гузашта 402 адад кам аст.