Дар нимсолаи якуми соли ҷорӣ Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вазорату идораҳо, мақомоти иҷроияи маҳаллии ҳокимияти давлатӣ ва дигар муассисаҳои буҷетӣ 258 тафтишу санҷиши молиявӣ гузаронида, ба маблағи умумии 251,1 млн. сомонӣ зарари молиявиро ошкор намудааст.

Ин нукта имрӯз, 9 август зимни нишасти матбуотии ин ниҳод баён гардид.

Тавре директори Агентӣ Сулаймон Султонзода зикр намуд, аз маблағҳои ошкорнамудаи зарар 240,3 млн. сомонӣ ба манфиати давлат барқарор карда шуд, ки 147,2 млн. сомонии он бевосита ба суратҳисоби буҷетӣ ва 93,3 млн. сомонӣ бо роҳи ҳисоббаробаркунӣ ва даромад кардани молу мулк мебошад.

Дар маҷмӯъ, дар ин давра дар ҳама самтҳои фаъолият 290,1 млн. сомонӣ ба давлат барқарор карда шудааст, ки беш аз 191 млн. сомонӣ ба суратҳисоби буҷетӣ, беш аз 93 млн. сомонӣ бо роҳи даромади воситаҳои пулию молӣ ва ҳисоббаробаркуниҳо ба манфиати давлат рост омада, 5,7 млн. сомонӣ ба фоидаи ташкилоту муассисаҳои давлатӣ ва шаҳрвандон мебошад.

Ҳамчунин, воҳидҳои ҳифзи ҳуқуқи Агентӣ 1267 ҷинояти коррупсионӣ, иқтисодии хусусияти коррупсионидошта ва дигар ҷиноятҳои марбут ба мақомоти ҳифзи ҳуқуқ нисбати 694 нафар ошкор намуда, тафтиши пешакии 381 парвандаи ҷиноятиро нисбати 460 нафар ба итмом расонида, ба судҳо ирсол намудаанд.

- Аз натиҷаи баррасӣ ва тафтиши парвандаҳои ҷиноятӣ ба унвонии вазорату идораҳо 1772 пешниҳод ва 734 дастури хаттӣ ирсол гардида, нисбати 303 нафар ҷазоҳои интизомӣ татбиқ гардида, 106 нафар аз вазифаҳои ишғолнамудаашон озод карда шуданд, - гуфт директори Агентӣ.