Дар нимсолаи аввали соли 2026 дар Тоҷикистон 35 ҳазору 699 маърака ва маросим ба қайд гирифта шудааст. Дар ин бора муовини раиси Кумитаи дин, танзими анъана ва ҷашну маросими назди Ҳукумати Тоҷикистон дар нишасти матбуотӣ хабар дод.

Ба гуфтаи масъулин, дар ин давра комиссияҳои доимии маҳаллӣ барои назорати иҷрои Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” 8661 рейд анҷом додаанд. Аз ин шумора 2337 рейд дар Душанбе, 35 рейд дар Вилояти Мухтори Кӯҳистони Бадахшон, 1213 рейд дар Суғд, 2292 рейд дар Хатлон ва 2784 рейд дар шаҳру ноҳияҳои тобеи ҷумҳурӣ сурат гирифтааст.

Кумита мегӯяд, натиҷаҳои санҷишҳо нишон медиҳанд, ки аксари шаҳрвандон талаботи қонунро риоя мекунанд, аммо ҳолатҳои нақзи меъёрҳо ҳанӯз ҳам ба қайд гирифта мешавад.

Мувофиқи маълумоти Суди Олӣ ва комиссияҳои доимии маҳаллӣ оид ба танзими ҷашну маросим, дар нимсолаи якуми соли 2026 вобаста ба риоя нашудани талаботи қонун 704 парвандаи ҳуқуқвайронкунии маъмурӣ баррасӣ шудааст. Ин рақам нисбат ба ҳамин давраи соли 2025, ки 630 ҳолат буд, 74 ҳолат бештар аст.

Аз шумораи умумии парвандаҳои баррасишуда нисбати 699 ҳолат ҷазои маъмурӣ таъйин гардида, 5 парванда ҳангоми баррасии судӣ қатъ шудааст. Ҳаҷми умумии ҷаримаҳои таъингардида 5 миллиону 97 ҳазору 96 сомониро ташкил медиҳад.

Масъулони Кумита мегӯянд, ки Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” дар пешгирии исрофкорӣ, ҳифзи манфиатҳои иҷтимоии шаҳрвандон ва боло бурдани фарҳанги маъракаороӣ нақши муҳим дорад. Ба гуфтаи онҳо, корҳои фаҳмондадиҳӣ ва назорат дар ин самт минбаъд низ идома хоҳад ёфт.

Яҳё МАҲМАДНИБИЕВ, “ҶТ”