Ҳамасола 5-уми декбар дар тамоми ҷаҳон ҳамчун Рӯзи байналмилалии волонтёрон ҷашн гирифта мешавад. Ин рӯз бо қарори Ассамблеяи генералии СММ аз соли 1985 қабул гардидааст, ки Ҷумҳурии Тоҷикистон низ онро дар сатҳи ба худ хос таҷлил мекунад.

Дар Ҷумҳурии Тоҷикистон тӯли солҳои ахир ҷавононе, ки мехоҳанд ҳамчун волонтёр дар хизмати омма бошанд, зиёд ба назар мерасанд. Аз ҷумла, фаъолияти онҳоро метавон дар чорабиниҳои сиёсию фарҳангӣ, илмию оммавӣ ва варзишию байналмилалӣ мушоҳида намуд, ки он аз рушди ин фаъолият дар кишвар далолат медиҳад. Ҳарчанд ин раванд дар кишварҳои Аврупо дарбаргирандаи қишрҳои гунонуни ҷомеа аст, вале дар кишвари мо аксаран ба фаъолияти волонтёрӣ ҷавонон майл доранд.

ФАЪОЛИЯТИ 15 ҲАЗОР ВОЛОНТЁР

Аз соли 2017 инҷониб дар назди Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Ташкилоти ҷамъиятии “Пайравони Пешвои миллат” таъсис гардидааст, ки то имрӯз дар ин ташкилот зиёда аз 15 ҳазор нафар ба фаъолияти волонтёрӣ машғуланд. Фаъолияти ихтиёриён ё волонтёрон соҳаҳои гуногуни иҷтимоиро дар бар мегирад ва барои расонидани кумак ба ҷомеа ройгон хизмат мекунанд. Волонтёрон ба таври ихтиёрӣ дар корҳои ободониву созандагӣ, аз ҷумла дар аксияҳои иҷтимоӣ, аёдати хонаҳои пиронсолон ва кӯдакон, роҳбаладиву тарҷумонӣ дар чорабиниҳои мухталиф иштирок намуда, саҳми худро мегузоранд.

Имрӯз ин қишри хайрхоҳу накукор аз кору пайкори хеш розӣ ва бо шуғли худ ифтихор доранд ва худро ба ин васила миёни ҷомеа муаррифӣ менамоянд.

Ҳасан Ваҳобов, яке аз он нафароне, ки мактаби волонтёриро сипарӣ намудааст, бардоштҳои худро чунин баён мекунад:

- Мактаби волонтёриро ба як дарахте монанд менамоям, ки меваҳояш ҷавонони фаъолу донишманд, накукору хайрхоҳ ва пешбарандаву ояндаи Ватани азиз мебошанд. Дар ҳақиқат ҳам, сафи волонтёронро беҳтарин ҷавонон, фаъолону ташаббускорон фаро гирифтааст, ки бо дӯстиву рафоқат ва самимияту меҳрубонӣ нисбати якдигар рӯз аз рӯз дар ободии Ватан саҳмгузор ҳастанд. Аз фаъолияти волонтёрӣ хотираҳои неку беҳтарин дорам. Ҳар як чорабиние, ки дар он иштирок мекунем, имкони дарёфти таҷрибаву як чизи нав аст. Мо бояд дар ҳама ҷо бо сарбаландиву ифтихор бигӯем, ки мо волонтёрем. Фаъолияти волонтёрӣ барои мо имкон фароҳам овардааст, ки хислатҳои накуи инсонии хешро барои аҳли ҷомеа расонида бошем. Зимни ин фаъолият имкон пайдо намудам, ки дар меҳмониҳо иштирок намуда, аз тамоми манотиқи ҷумҳурӣ дӯстони зиёд пайдо намоям ва ба ин восита аз фарҳанги дигар минтақаҳои кишвари азизам бохабар бошам.

Ҳамзамон Ҳасан мегӯяд, ки фаъолияти волонтёрӣ ба ӯ воқеан шахси ватандӯсту хештаншинос, меҳанпарвару накукор буданро омӯхт.

- Дӯстони нав, шахсиятҳои бузург ва хирадманд, ҷавонони соҳибистеъдоду ихтироъкорро пайдо ва шиносоӣ намудам. Ман фикр мекунам, ин фаъолият барои ҷавонон аст. Ҷавононе, ки дар асл накӯӣ ва ватандӯстиро дарк мекунанду мехоҳанд дар пешбурди ҷомеа ҳиссагузор бошанд. Ҷавононе, ки худро пайравони асили Пешвои муаззами миллат меҳисобанду мехоҳанд, мактаби бузурги давлатдории муҳтарам Эмомалӣ Раҳмонро омӯзанд, - илова менамояд Ҳасан.

Манижа Солиҳова, ҷавондухтари дигар, ки гирандаи ҷоизаи беҳтарин волонтёр дар соли 2021 аст, мегӯяд волонтёрӣ яке аз роҳҳои мустақил шудани ӯ дар зиндагист.

Ӯ мегӯяд: “Волонтёрӣ фаъолиятест, ки имрӯз ба ман ҳам нон доду ҳам ном, фаъолияте ки аз минбарҳо сухан карданро омӯхт, фаъолияте, ки дар ҷомеа як ҷавони қавииродаву ватандӯсту инсондӯст буданро омӯхт. Умуман, волонтёрӣ фаъолиятест, ки ҳар як шахс метавонад, худро ташаккул диҳад, рушд ёбад, кадри хубе омода шавад, аз ҳама муҳимаш он ки бо амали хайр ҳам дар ҷомеа саҳмгузор мешаваду ҳам ояндаи хешро бо дасти хеш месозад. Шод кардани як тифли ятим, дар суҳбати як модари бемору як падари маҷрӯҳ нишас-тан ва хушнуд гардонидани онҳо мояи ифхтихори мо-волонтёрон аст”.

Манижа мегӯяд, маҳз аз фаъолияти волонтёриаш сазовори номи гирандаи Стипендияи президентӣ дар солҳои 2021-2022 ва 2022-2023 гардид.

- Ниҳоят хатми курси омӯзишии “Ҷавонон - пайравони Пешвои миллат” дар се моҳи таҳсил метавонад, ҳар як ҷавонеро, ки таҳсили ин маҳфил мекунад, мактаби давлатдории Пешвои миллатро омӯзонад. Қабули қонун “Дар бораи фаъолияти волонтёрӣ” дарак аз он медиҳад, ки давлату Ҳукумат доимо дастгиру раҳнамои мо ҷавононанд, - илова намуд Манижа.

ВОЛОНТЁРОН ВА ИНТИХОБОТ

Волонтёрон ҳамзамон дар чорабиниҳои муҳими сиёсии кишвар нақши бориз доранд. Инро мо дар раванди интихоботи ҳам президентӣ ва ҳам парлумонии кишвар соли 2020 мушоҳида карда будем.

Дар раванди ҳарду интихобот волонтёрон хизматрасониҳои ройгонро ба роҳ монданд ва амалҳои хайрхоҳонаро дар ин маъракаи муҳими сиёсӣ анҷом доданд, ки он аз ҳисси ватандӯстӣ ва ифтихори баланди миллии насли ҷавони кишвари мо далолат медиҳад. Дар ин чорабиниҳои муҳими сиёсӣ, ки аввалин маротиба волонтёрон ширкат доштанд, бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар интихоботи парлумонӣ 5 ҳазор ва дар интихоботи президентӣ 10 ҳазор волонтёр ҷалб гардида буданд. Дар он шабу рӯзҳо, ки чорабиниҳои муҳими сиёсӣ дар кишвар мегузашт, волонтёрон дар 68 шаҳру ноҳияҳои кишвар хизматрасониҳои ройгонро ба роҳ монда буданд.

Аз ҷумла, Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар тамоми ҳавзаҳои интихоботии шаҳру ноҳияҳои ҷумҳурӣ волонтёронеро ҷалб намуда буд, ки онҳо ҳайати волонтёрони тарғиботчӣ, хизматрасон ва волонтёрони забондон буданд, ки ҳар кадоме вазифаву корҳои худро анҷом медоданд.