Ӯро чун духтари дорои симои тоҷикона мешиносанд. Бо чеҳраи зебову мӯйҳои дарозу зоҳири ороставу тоҷиконааш. Атрофиён зиёд аз ин ҳусну ҷамол ва ботини чун зоҳираш мегӯянду васфаш мекунанд. Духтарест бо ахлоқи ҳамида, рафтор ва ҷаҳонбинии рушдёфта. Хушгуфтору ширинзабон ва аҳли фаҳму бо дарки зиёд. Ҳамчунин, боҳунару суханвару забондон. Сифатҳое чун хоксорӣ, эҳтиром ба калонсолон, меҳрубонӣ нисбат ба дигарон симои ӯро мукаммал месозанд, бегумон. Ин нуктаҳоро на танҳо волидон, балки ҳамаи онҳое, ки ӯро мешиносанд зикр менамоянд, ҳар замон.

Баробари ин ҳама, вай иштирокчии фаъоли озмунҳои ҷумҳуриявӣ ва байналмилалӣ миёни хонандагони мактаб ба ҳисоб меравад. Ин озмунҳо дар ташаккули огоҳиву афзудани дониш ба ӯ кумак карда, ҳамзамон боис гашт, ки дӯстони зиёде ҳам пайдо намояд. Ӯ қабл аз ғолибият дар озмуни “Хонандаи сол – 2025” дар синфи ҳафтум ғолиби ҷойи якум дар озмуни “Хаттоти беҳтарин” дар соли 2023, сазовори ҷойи дуюм дар озмуни “Забон донӣ-ҷаҳон донӣ” соли 2024, ғолиби ҷойи сеюм дар даври ҷумҳуриявии Олимпиада аз фанни забони давлатӣ дар соли 2025, инчунин дорандаи чандин ифтихорномаву сертификат вобаста ба иштироки фаъолона дар озмуну олимпиадаҳо мебошад.

Аммо аз ҳама хотирмон ва санҷиши қавӣ барои қаҳрамони мо озмуни шаҳрии “Хонандаи сол – 2025” буд. Озмуни мазкур имконе фароҳам сохт, ки ӯ ба таври комил худро нишон диҳаду талоши зиёд ба харҷ дода, аз ҷумлаи ғолибони он гардад. Ин озмун ҳисси бовар ба хешу тавоноиҳои худро дар ӯ боло бурда, ба вай ёдоварӣ намуд, ки ҳар заҳмати содиқона натиҷаи хуб медиҳад, чун бидуни ранҷ ганҷ муяссар намешавад.

Мо ҳарф мезанем атрофи Нушофарин Раҷабзода, хонандаи синфи 10-и Муассисаи таълимии давлатии “Мактаби байналмилалии президентӣ” аз ноҳияи Сино, ки чанде пеш ғолиби озмуни “Хонандаи сол – 2025” гардид.

Озмуни шаҳрии “Хонандаи сол – 2025” рӯзҳои 6-7 апрели соли равон дар Муассисаи давлатии “Маркази кӯдакон ва наврасони шаҳри Душанбе” баргузор гардида, мувофиқи шартҳои озмун дар қисмати аввали рӯзи 6 апрел корҳои тестӣ ва қисмати дуюми рӯз корҳои хаттӣ аз фанҳои таълимӣ гузаронида шуд. Дар рӯзи дуюми озмун, яъне 7 апрел, баҳогузорӣ ба намоиши дастовардҳо, маҳорати суханварӣ ва донишҳои назариявӣ доир гашта, баъди баҳодиҳӣ ба донишҳои назариявӣ ва амалии довталабони озмун ӯ ғолиб дониста шуд.

“Мо дар ин озмун бо омодагии ҷиддӣ ҳозир шудем. Пеш аз ҳама кӯшиш кардам, дониши худро аз фанҳои асосӣ амиқтар намоям ва ба омӯзиши иловагӣ машғул шавам. Ҳамчунин, вақти худ-ро дуруст ба нақша гирифта, ҳар рӯз ба такрор ва такмили мавод диққати махсус медодам ва дар мавзуъҳои гуногун бо забонҳои хориҷӣ эссе менавиштам. Илова бар ин, дар баробари таҳсил, ба рушди малакаҳои суханронӣ ва фикрронии мантиқӣ низ аҳамият додам, зеро озмун на танҳо санҷиши дониш, балки қобилияти баён ва ҳозирҷавобиро низ талаб мекард”-мегӯяд Нушофарин.

Ба гуфтаи ӯ дар ин замина дастгирии омӯзгорон ва волидайн низ барояш хеле муҳим буд. Зеро маҳз дастгирии онҳо буд, ки ӯ ба баъзе душвориҳо нигоҳ накарда, кӯшиш кард ба худ бовар дошта бошад ва бо иродаи қавӣ, то ба ғолибият бирасад.
- Ба назари ман, ҳар имконият фурсатест баҳри мо барои амалӣ гаштани орзуву ба даст овардани таҷрибаҳои нав. Моро лозим аст, ки аз онҳо ба хубӣ истифода намоем ва аз душвориҳо наҳаросем. Баръакс, бо талошу заҳмат барои ғолибият мубориза барем, новобаста ба он ки ғолиб мешавем ё на,-таъкид менамояд ӯ.

Нушофарин аз зумраи хонандагонест, ки аз овони кӯдакӣ ба донишомӯзӣ шавқи зиёд дошт. Ӯ ҳамаи фанҳои таълимиро дӯст медорад ва кӯшиш менамояд, ки онҳоро нағз аз худ намояд. Ба гуфтаи омӯзгорон ва ҳамсинфонаш вай ҳамеша бо масъулият ба дарсҳо муносибат намуда, бо саволди хубу андешаҳои амиқ фарқ мекунад.

Муаллимаш Парвина Назирмадова аз хислатҳои нек ва дорои фаҳмиши баланд будани шогирдаш ёдрас шуд. Хислатҳои чун эҳтиром ба омӯзгорону волидон ва қобилияти гӯш карда тавонис-тани ӯ дигаронро. Номбурда иброз дошт, ки шогирдаш миёни ҳамсинфон дорои иззату эҳтиром ва обрӯ мебошад. Ӯ дар идома илова кард, ки аз синфи ҳафтум инҷониб ба вай дарс мегӯяд ва ӯро барои озмунҳо омода месозад. Ба гуфтаи ӯ шогирдаш хеле боис-теъдод буда, дорои ҳунарҳои бофтану духтан, пухтупаз буда, инчунин дар қироати шеър, навиштани матнҳо бо забонҳои хориҷӣ ва суханварӣ ҳам маҳорат дорад.

Тавре муаллимаш қайд намуд: "Ин дастовард пеш аз ҳама натиҷаи меҳнати пайваста ва масъулиятшиносии ӯст. Вай аз ҷумлаи хонандагонест, ки ҳамеша бо мақсад ва иродаи қавӣ ба ҳар марҳилаи озмун муносибат мекунад. Ҳар як супоришро бо ҷиддият иҷро намуда, кӯшиш мекунад дониши худро амиқтар гардонад. Инчунин, дар ин озмун нақши муҳити оилавӣ ва дастгирии дигар омӯзгорон низ хеле муҳим буд ва ба мушоҳида расид. Ӯ тавонист, ки имкониятҳоро дуруст истифода бурда, қобилиятҳои худро рушд диҳад. Ҳамаи инҳо сабаб шуд, ки шогирдам ба чунин дастоварди назаррас ноил шавад".

Инчунин, ӯ дар идома қайд намуд, ки Нушофарин баробари огоҳии хуб аз забони тоҷикӣ, донандаи хуби забонҳои русӣ, англисӣ, туркӣ ва арабӣ аст. Ӯ таъкид дошт, ки ба ҷуз мактаб, ҳамчунин саҳми волидон низ дар таълиму тарбия ва шакл-гирии шахсияти наврасон хело муҳим аст. Аз ин рӯ, вай аз фурсати муносиб истифода намуда, миннатдории худро ба волидоне, ки пайваста бо мактаб дар ҳамкорӣ будаву чунин наврасони лаёқатмандро барои ҷомеа тарбият менамоянд, изҳор намуд.
Парвина Назирмадова дар идома афзуд, ки дар вуҷуди Нушофарин аз ҳоло нишонаҳои роҳбариро мушоҳида мекунад, чун ӯ метавонад масъулиятро ба уҳда гирад, дар ҳолатҳои зарурӣ ташаббус нишон диҳад ва ҳамсинфонро ба иҷрои корҳои муштарак ҳидоят намояд. Инчунин, вай қобилияти ба инобат гирифтани андешаҳои дигаронро низ дорад.

“Бовар дорам, ки ӯ бо ин ҳама хусусиятҳои доштааш дар оянда шахси босавод, масъулиятшинос ва фаъоли ҷомеа мегардад. Бо назардошти ирода, меҳнатдӯстӣ ва ҳадафҳои равшане, ки дорад, метавонад дар ҳар соҳае, ки интихоб мекунад, ба натиҷаҳои назаррас ноил шавад. Ман умед дорам, ки ӯ на танҳо барои худ, балки барои ҷомеа низ шахси судманд хоҳад буд. Ва аз ҳоло метавонам ӯро дар вазифаҳои сардухтур, равоншиноси хуб, прокурор ва сиёсатшинос тасаввур кунам, ки аз уҳдаи онҳо ба хубӣ хоҳад баромад”-илова кард номбурда.

Ҳамсинф ва дӯсташ Нисо Раҳимова вайро чун духтари оромтабиат, хонандаи фаъолу кумакрасони дигарон дар синф васф кард. Нисо қайд намуд, ки ӯ ҳамеша дигаронро эҳтиром менамояд ва кӯшиш мекунад, ки дар ҳама ҳолат оромии ботинии худро ҳифз намояду бо тарафи муқобил оромона суҳбат кунад. Ҳамзамон ӯ афзуд: "Дастоварди ахири ҳамсинфам моро зиёд шод намуд. Мо ба унвони ҳамсинфон барояш таманнои муваффиқиятҳои бештар менамоем ва фикр мекунам, ки ӯ дар ҳақиқат арзандаи номи хонандаи сол ҳаст, чун тамоми он вижагиҳои лозимаро дар худ дорад”.

Аз нигоҳи Нушофарин муҳити мактаб барои рушди ҳар хонанда нақши бузург мебозад. Ӯ таъкид менамояд, ки ҳамарӯза аз мактаб чизҳои навро барои худ меомӯзаду кашф мекунад. Дар мактаби онҳо ҳама шароити хуби таҳсил фароҳам оварда шудааст, ки ба онҳо имкон медиҳад дониши худро ҳамарӯза такмил диҳанд.

Нушофарин барои як ояндаи дурахшон аз ҳозир нақшаҳои зиёдеро барои амалӣ кардан тарҳрезӣ кардааст. Ӯ мехоҳад пас аз хатми мактаб таҳсилро дар риштаи ҳуқуқшиносӣ идома дода, бо ин роҳ ба халқаш хизмат намояд ва ҳамеша номбардори волидон бошад. Вай андешаҳои худро дар охир чунин ҷамъбаст намуд:

- Ба ҳамсолони худ маслиҳат медиҳам, ки аз ҳар як фурсат барои омӯзиш ва рушд самаранок истифода баранд. Ҳатто имкониятҳои хурд метавонанд ба натиҷаҳои бузург оварда расонанд, агар инсон онҳоро қадр кунад. Онҳоро зарур аст, ки аз душвориҳо наҳаросанд. Дар роҳи муваффақият ҳамеша монеаҳо пеш меоянд, аммо маҳз гузаштан аз онҳо инсонро қавитар месозад.

Г. КАРИМОВА, “ҶТ”