Чорабинии мазкур дар бинои Театри мусиқию мазҳакавии ба номи М. Назарови шаҳри Хоруғ доир гардид.

Қабл аз оғоз, дар як гушаи театр намоиши дастовардҳои хонандагони муассисаҳои таҳсилоти ҳамагонӣ ва варзишгарон ба маърази тамошо гузошта шуд.

Раиси ВМКБ Мирзонабот Алишер Худобердӣ дар ибтидо зикр кард, ки “таҳти роҳбарию роҳнамоии Пешвои миллат муҳтарам Эмомалӣ Раҳмон дар қатори дигар комёбиҳои муҳими таърихии дар соҳаи илму маориф бадастомада, имконият фароҳам омад, ки озмунҳои ҷумҳуриявии “Фурӯғи субҳи доноӣ китоб аст”, “Илм фурӯғи маърифат”, “Тоҷикистон Ватани азизи ман”, инчунин мусобиқаю озмунҳои зеҳнию маърифатӣ ва фарҳангию варзишӣ доир карда шаванд. Имрӯз ин озмунҳо ба ҳаёти маърифатию илмӣ ва фарҳангии миллат такони ҷиддӣ бахшида, дар баробари баланд бардоштани сатҳи маърифатнокии миллат, дарёфти чеҳраҳои нави соҳибилму соҳибистеъдод, ҳамчунин, бобати баланд бардоштани шууру тафаккури ҷамъият ҳамаҷониба мусоидат менамоянд.

Роҳбари маърифатпарвари давлат, Пешвои миллат муҳтарам Эмомалӣ Раҳмон дар мавриди баргузории озмунҳои миллӣ қайд менамоянд, ки “Ҳадафи мо аз баргузории озмунҳои “Илм–фурӯғи маърифат”, “Тоҷикистон–Ватани азизи ман”, “Фурӯғи субҳи доноӣ китоб аст” ва олимпиадаву озмунҳои гуногун тақвият бахшидани ҳувияти миллӣ, ҳисси ифтихор аз таъриху тамаддуни бостонии халқамон, боз ҳам баланд бардоштани сатҳи саводнокиву маърифатнокии мардум, қабл аз ҳама, наврасону ҷавонон, тақвияти завқи зебоипарастии онҳо ва пайдо кардани истеъдодҳои нодир аз байни наслҳои ояндасоз мебошад””.
Зикр гардид, ки кишвари азизамон дар таҳкими сиёсати давлатдорӣ ва бунёди ҷомеаи демократӣ сиёсати ҷавононро яке аз самтҳои асосии фаъолияти худ интихоб намудааст. Чунин ғамхорӣ ва таваҷҷуҳ ҷавононро водор месозад, ки дар ҷавоб ба ҳамаи ғамхориҳои Роҳбари давлат тамоми қувва ва неруи ақлонию ҷисмонии худро баҳри расидан ба дастовардҳои шоён, вусъат бахшидани корҳои ободониву созандагӣ, баланд бардоштани мавқеи Ҷумҳурии Тоҷикистон дар арсаи ҷаҳонӣ, муаррифии ватан тавассути азхудкунии донишҳои муосир, иштироки фаъолона дар чорабиниҳои варзишӣ ва сиёсӣ сафарбар намоянд.

Гуфта шуд, ки бо ташаббус ва дастгириҳои пайвастаи Роҳбарияти Олии кишвар дар тамоми гӯшаву канори кишвари маҳбубамон, аз ҷумла ВМКБ иншооти варзишӣ бо сифати баланд сохта, мавриди баҳрабардорӣ қарор дода мешаванд. Айни замон дар вилоят баҳри рушди тарбияи ҷисмонӣ ва варзиш 451 иншооти варзишӣ,фаъолият доранд.

Танҳо соли 2025, бо дастгирии Ҳукумати мамлакат ва мусоидати соҳибкорони ватандӯст дар шаҳру ноҳияҳои вилоят 21 майдонча ва ду толори варзишӣ бунёд шуданд. Варзишгарони вилоят бошанд, дар мусобиқаҳои ҷумҳуриявӣ ва байналмилалӣ сазовори 285 медал, аз ҷумла 78 тилло, 89 нуқра ва 118 медали биринҷӣ гардиданд.

Дар идомаи чорабинӣ, ба ғолибони озмунҳои ҷумҳуриявӣ ва мусобиқаҳои ҷумҳуриявию байналмилалӣ ба тариқи инфиродӣ ва даставӣ дар вазъияти тантанавӣ ифтихорномаю сипосномаҳо, диплом ва мукофотпулӣ тақдим гардид.

Ҳамчунин, беҳтарин мураббиён ва роҳбарони федератсияҳои варзиш низ қадрдонӣ шуданд.

Шакармамад Мирмамадов бошад, варзишгари сол – 2025 эълон гардида, бо "Шоҳҷоиза" қадр карда шуд.

Дар охири чорабинӣ ҳунармандони вилоят бо барномаи бошукӯҳи консертӣ хотири ҳозиринро шод гардонданд.

Садоншо ҶАНОБИЛШОЕВ, “ҶТ”