Дар Донишгоҳи давлатии тиҷорати Тоҷикистон дар соли таҳсили 2025-2026 4 ихтисоси нав: иқтисодиёт ва идора дар корхона; муносибатҳои байналмилалӣ; таъмини иқтисодии фаъолияти гумрукӣ; дизайн ва графикаи компютерӣ кушода шуд.

Ин нуктаро ректори Донишгоҳ Хайрулло Назарзода 24 июл, зимни нишасти матбуотӣ баён дошта, аз ҷумла қайд намуд, ки ихтисосҳои мазкур вобаста ба талаботи бозори меҳнат таъсис дода шуда, довталабон барои таҳсил аз рӯи чунин ихтисосҳо нисбатан бештар аст.

Ҳамчунин, таъкид гардид, ки Донишгоҳи давлатии тиҷорати Тоҷикистон мувофиқи радабандии Агентии назорат дар соҳаи маориф ва илми назди Президенти Ҷумҳурии Тоҷикистон дар байни муассисаҳои таҳсилоти олии касбӣ дар даҳгонаи беҳтарин муассисаҳои олии кишвар қарор дорад.

Донишгоҳ аз рӯи 36 ихтисоси барномаи бакалавриат, 10 ихтисоси барномаи магистратура, 13 ихтисоси барномаи доктор PhD ва 7 ихтисоси барномаи таҳсилоти олии дуюми касбӣ мутахассисонро барои бозори меҳнати ватанӣ ва хориҷӣ омода мекунад.

Шаҳло ЭШОНОВА, “ҶТ”