Дар соли 2025 тавассути Маркази миллии тестӣ ба муассисаҳои таҳсилоти олии касбӣ ҳамагӣ 100 ҳазору 86 довталаб номнавис шудааст.

Дар ин бора 27-уми январ Сабзалӣ Ҷаъфарзода, директори Маркази миллии тестии назди Президенти Ҷумҳурии Тоҷикистон зимни нишасти матбуотӣ иттилоъ дод.

Ба гуфтаи ӯ, аз ин шумора дар чор даври имтиҳонҳо (қисми А) 88 ҳазору 244 нафар иштирок карданд, ки 88,17% аз довталабони номнависшударо дар бар мегирад. Ин нишондиҳанда нисбат ба солҳои 2023 ва 2024 мутаносибан 1,8 ва 0,76 банди фоизӣ баландтар мебошад.

Ҳамчунин, зикр гардид, ки довталабони дорои таҳсилоти умумии асосӣ (синфи 9-ум), ки дар ҳамаи давраҳои бақайдгирӣ номнависшудаанд, 25 ҳазору 64 нафарро ташкил доданд. Аз ин шумора дар се даври имтиҳонҳо (қисми Б) 23 ҳазору 385 нафар иштирок карданд. Ин нишондиҳанда дар соли 2025 нисбат ба солҳои 2023 ва 2024 мутаносибан 0,17 ва 0,39 банди фоизӣ баландтар аст.

Ҷаъфарзода ҳамчунин таъкид кард, ки тибқи нақшаи қабули донишҷӯён барои соли таҳсили 2025-2026 ба муассисаҳои таҳсилоти олии касбӣ 70 ҳазору 730 ҷой ҷудо гардидааст, ки нисбат ба соли гузашта 2 396 ҷой (3,51%) зиёд мебошад. Аз шумораи умумии ҷойҳо 11 ҳазору 622 ҷой (16,4%) барои таҳсили ройгон ва 59 ҳазору 108 ҷой (83,6%) барои таҳсили пулакӣ пешбинӣ шудааст.

Сафиаллоҳ ИБОДЗОДА, “ҶТ”