То имрӯз дар назди муассисаҳои илмӣ, таҳсилоти олии касбӣ ва таҳсилоти касбии баъд аз муассисаи олии таълимии кишвар 114 шурои диссертатсионӣ таъсис дода шудааст, ки аз онҳо 89 шурои диссертатсионӣ фаъолият дошта, аз рӯи 210 ихтисос барои дарёфти дараҷаҳои илмии доктори илм, номзади илм ва доктори фалсафа (PHD)-доктор аз рӯи ихтисос диссертатсияҳоро баррасӣ менамоянд.

Тавре Сайфиддин Давлатзода, раиси Муассисаи давлатии "Комиссияи олии аттестатсионии назди Президенти Ҷумҳурии Тоҷикистон" зимни нишасти матбуотӣ 28 январи соли ҷорӣ ба хабарнигорон иттилоъ дод, дар соли 2025 нисбат ба соли 2021 63 ва нисбат ба соли 2024 13 шуро зиёдтар амал намудаанд.

Зикр гардид, ки соли 2025 дар 4 муассисаи таълимӣ, аз ҷумла Донишкадаи энергетикии Тоҷикистон, Донишгоҳи давлатии Хоруғ ба номи Моёншо Назаршоев, Донишгоҳи давлатии Данғара ва филиали Донишгоҳи давлатии Москва ба номи М.В.Ломоносов дар шаҳри Душанбе бори аввал шуроҳои диссертатсионӣ таъсис дода шуда, ба фаъолият шуруъ намуданд. Ҳамчунин, дар ин давра ба ҳайати 37 шуро тағйиру иловаҳо ворид карда шуда, 31 шурои диссертатсионӣ таъсис дода шуд, ки нисбат ба соли қаблӣ 23 шуро зиёд мебошад.

Таъкид гардид, ки ҷиҳати татбиқи раванди рақамикунонӣ дар Таснифоти ихтисосҳои илмии доктори фалсафа (PhD) дар мамлакат ва Феҳристи ихтисосҳои илмӣ барои дарёфти дараҷаи илмӣ дар Ҷумҳурии Тоҷикистон ихтисосҳои иқтисодиёти рақамӣ, иқтисодиёти сабз, забоншиносии амалӣ ва рақамӣ ворид карда шуда, аз рӯи ихтисосҳои иқтисодиёти рақамӣ ва иқтисодиёти сабз шурои диссертатсионӣ таъсис дода шуд.

Дар ин давра аз шуроҳои диссертатсионӣ барои дарёфти дараҷаҳои илмӣ 602 парвандаи аттестатсионӣ ва диссертатсия ворид шудааст, ки 80 парванда барои дарёфти дараҷаи илмии доктори илм, 418 парванда барои дарёфти дараҷаи илмии номзади илм ва 104 парванда барои дарёфти дараҷаи илмии доктори фалсафа ( PhD)- доктор аз рӯи ихтисос мебошад.

Дар ин давра 46 қарори шуроҳои диссертатсионӣ доир ба додани дараҷаи илмӣ бинобар ҷавобгӯ набудан ба талаботҳои муқарраршуда бекор карда шудааст.

Иттилоъ дода шуд, ки айни замон дар ҷумҳурӣ тахминан 6675 нафар дорои дараҷаи илмӣ буда, синну соли миёнаи доктори илм ба 64, номзади илм ба 50 ва доктори фалсафа ( PhD)- доктор аз рӯи ихтисос ба 31 рост меояд.

Шаҳло ЭШОНОВА, “ҶТ”