24 август дар Фурудгоҳи байналмилалии Имоми Хомейнии шаҳри Теҳрон маросими пазироии самимии ҳайати Кумитаи кор бо ҷавонон ва варзиши назди Ҳукумати Ҷумҳурии Тоҷикистон зери роҳбарии раиси Кумита Гулаҳмадзода Зулфиқор Аҳмад аз ҷониби роҳбарияти Вазорати варзиш ва ҷавонони Ҷумҳурии Исломии Эрон баргузор гардид.

Дар ин бора аз бахши таҳлил ва иттилооти Кумитаи кор бо ҷавонон ва варзиш хабар доданд.

Тибқи иттилоъ, дар рафти маросим ҷонибҳо ба ҳамдигар изҳори сипос намуда, омодагии худро барои таҳкими равобити дӯстона миёни Тоҷикистону Эрон дар самтҳои варзиш ва сиёсати ҷавонон таъкид карданд.

Зимни мулоқот роҳбарони ҳар ду ниҳод масъалаҳои густариши ҳамкорӣ дар соҳаҳои варзиши касбӣ ва солимгардонии ҷавонон, ба роҳ мондани ҳамкориҳои судманди фарҳангию иттилоотӣ, инчунин, табодули таҷриба миёни федератсияҳои варзишӣ ва иттиҳодияҳои ҷавононро мавриди баррасӣ қарор доданд.

Ҷонибҳо изҳор доштанд, ки ин гуна сафарҳои расмӣ ва мулоқотҳои сатҳи баланд имконият медиҳанд, ки дӯстии дерина ва ҳамкориҳои судманд дар самти кор бо ҷавонон ва варзиш миёни ду кишвар боз ҳам тақвият ёбанд.

Маросими истиқбол дар фазои дӯстӣ ва ҳамдигарфаҳмӣ анҷом ёфт.