Дар доираи татбиқи сиёсати давлатии ҷавонон шароити кору таҳсил, машғул шудан ба варзиш сол аз сол беҳтар гардида, насли ҷавон ҳамчун неруи бузурги пешбарандаи ҷомеа дар рушду шукуфоӣ ва амалӣ шудани ҳадафҳои созандаи Ҳукумати мамлакат саҳми арзанда мегузоранд. Дар шаҳри Гулистони вилояти Суғд дар замони соҳибистиқлолӣ иншооти зиёди варзишӣ бунёд ва бо ин васила рушди соҳа таъмин гардида, оммавияти варзиш дар мадди аввал қарор гирифтааст. Ҳамин аст, ки варзишгарони шаҳри Гулистон ҳар сол ба дастовардҳои зиёд ноил мегарданд.

Аҳлиддин Абдураҳмонов, мудири бахши кор бо ҷавонон ва варзиши шаҳри Гулистон комёбиҳои ҷавонони шаҳрро натиҷаи ғамхориҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон арзёбӣ намуда, чунин мешуморад, ки бояд ҳар фарди худогоҳу бедордил аз ин имконоти мавҷуда самаранок истифода намояд. Манзури ҳамсуҳбати мо ин аст, ки имрӯз барои насли ҷавону наврас шароит фароҳам оварда шудааст, то забон омӯзанд, касбу ҳунареро интихоб намуда, ояндаи худро бисозанд, ба намудҳои гуногуни варзиш машғул гардида, дар арсаи ҷаҳон давлату миллати худро шоиста муаррифӣ намоянд.

Маълумотҳои оморӣ нишон медиҳад, ки қариб 29 дарсади аҳолии шаҳри Гулистонро ҷавонон ташкил медиҳанд. Яъне шумораи ҷавонон дар шаҳр ба 14 ҳазору 400 нафар баробар гардидааст ва имрӯз ин қишри ояндасози ҷомеа дар ҳамаи соҳаҳо фаъолият доранд. Ҳоло дар шаҳр аз ҳисоби ҷавонон 4 нафар вакили халқии шаҳр, 39 нафар дар вазифаҳои роҳбарикунанда фаъолият дошта, дар вазифаҳои хидмати давлатӣ бошад, 33 нафар ҷавонон фаъолияти худро идома медиҳанд. Шумораи гирандагони Стипендияи президентӣ ба 16 нафар ва Стипендияи раиси шаҳри Гулистон ба 40 нафар расидааст. Ин нишонаи таваҷҷуҳ ва дастгириҳои пайвастаи давлату Ҳукумат, татбиқи сиёсати давлатии ҷавонон арзёбӣ карда мешавад.

Зимни суҳбат Аҳлиддин Абдураҳмонов аз дастовардҳои варзишгарони шаҳр дар соли 2025 ёдоварӣ намуда, маълумот дод, ки дар ин давра варзишгарон ба гирифтани 745 медал мушарраф шудаанд. Ба гуфти ҳамсуҳбати мо дар ҳудуди шаҳр, дар умум, 136 иншооти варзишӣ фаъолият дошта, аз ин теъдод 56 майдончаи варзишӣ, 6 ҳавзи шиноварӣ, 9 варзишгоҳ, 26 толори варзишӣ ва 38 майдончаи бозии кӯдакона мебошад. Ҳоло дар шаҳр як мактаби варзишӣ амал менамояд, ки дар он 27 нафар мураббӣ фаъолият доранд. Аз рӯи 9 намуди варзиш, ба монанди футбол, волейбол, бокс, муайтай, гӯштини тарзи юнонӣ-румӣ, гӯштини тарзи озод, ҳендбол, шоҳмот ва тенниси рӯйи миз дар 50 гурӯҳҳои машқӣ бо ҷалби 736 нафар наврасону ҷавонон, аз ҷумла 79 нафар духтарон машқу тамрин менамоянд.

- Бо мақсади иҷрои дастуру супоришҳои Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва нақшаи кории Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар соли 2025 мусобиқаҳо бо усули маҳал ба маҳал ва байни ташкилоту муассисаҳо аз рӯйи намудҳои волейбол, футбол, гӯштингирӣ ва шашкаю шоҳмотбози беҳтарин ташкил ва баргузор карда шуд. Инчунин, дар муассисаҳои таълимии миёнаи умумии шаҳр ва ҷамоати шаҳракҳо маҳфили “Варзиш” амал мекунад, ки дар он 235 нафар хонандагон фаро гирифта шуда, 55 нафарашонро духтарон ташкил мекунанд, - афзуд Аҳлиддин Абдураҳмонов.

ОММАВИЯТИ ВАРЗИШ ОМИЛИ СОЛИМӢ

Ҳукумати Ҷумҳурии Тоҷикистон бо назардошти солим нигоҳ доштани ҷомеа оммавигардонии варзишро яке аз ҳадафҳои неку дурбинона қарор дода, дар маҳалҳо ба ин масъала таваҷҷуҳи бештар равона мегардад. Ҳамсуҳбати мо ҳам бо такя ба гуфтаҳои боло иброз дошт, ки тибқи нақшаи тасдиқгардида бо мақсади оммавигардонии варзиш ва тарғиби тарзи ҳаёти солим ҳар ҳафта рӯзи шанбе ташкил ва баргузории машқи пагоҳирӯзӣ ба роҳ монда шудааст. Дар соли 2025 91 маротиба машқҳои пагоҳирӯзӣ дар боғҳои фарҳангию фароғатӣ, варзишгоҳи марказӣ ва дар гулгашту хиёбонҳои шаҳр ва ҷамоати шаҳракҳои тобеи шаҳри Гулистон, бо ҷалби 19 350 нафар роҳандозӣ шудааст.

Бештар бедор намудани ҳисси худшиносиву худогоҳӣ, ватандӯстӣ, пешгирии амалҳои номатлуб дар байни ҷавонон ва даъвати онҳо барои омӯзиши илму ҳунар яке аз самтҳои муҳими фаъолияти бахши кор бо ҷавонон ва варзиш маҳсуб меёбад. Аҳлиддин Абдураҳмонов бо ёдоварӣ аз тадбирҳои андешида дар ин самт маълумот дод, ки дар ин давра миёни ҷавонон, волидайни онҳо ва аҳолии ҷамоати шаҳракҳо ва маҳаллаҳои шаҳр, корхонаву ташкилотҳо, инчунин муассисаҳои таҳсилоти миёнаи умумӣ ва коллеҷи тиббӣ бо ин мақсад наздик 70 вохӯриву мулоқот ва хониши сиёсӣ, 45 конференсия, мизи мудаввар, 129 аксияву ҳамоиш, 7 роҳпаймоӣ ва 51 маҳфил дар мавзуъҳои гуногун ба роҳ монда шуданд.

- Бо назардошти муҳимияти ин самти фаъолият дар ин давра аз ҷониби масъулини бахш ва ҷавонони фаъоли шаҳр зиёда аз 195 мақолаҳои тарғиботиву ташвиқотӣ ва 215 видионаворҳои тарбиявӣ дар мавзуъҳои гуногун баҳри ҳифзи Истиқлолият, ваҳдату ягонагӣ, арҷ гузоштан ба арзишҳои милливу башарӣ, пешгирии шомилшавии ҷавонон ба ҳизбу ҳаракатҳои тундрав, пешгирии бемориҳои сироятӣ ва маъракаҳои муҳими сиёсӣ таълиф гардида, теъдоде аз онҳо дар ҳафтаномаи “Соҳил”, сомонаи расмии мақомоти иҷроияи ҳокимияти давлатии шаҳр, сомонаҳои расмии Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Раёсати кор бо ҷавонон ва варзиши вилояти Суғд ва саҳифаи расмии бахши кор бо ҷавонон ва варзиши шаҳр ба нашр расидааст. Минбаъд низ ин гуна корҳои тарғиботию ташвиқотӣ дар байни аҳолӣ, махсусан ҷавонон, сокинони шаҳр ва ҷамоати шаҳракҳо мунтазам баргузор карда мешавад, - гуфт ҳамсуҳбати мо.

Ба назари Аҳлиддин Абдураҳмонов баргузории чунин чорабиниҳо пеш аз ҳама баҳри бедор намудани ҳисси миллии ҷавонон ҷиҳати эҳтиром ва арҷгузорӣ ба арзишҳои миллӣ, муқаддасоти давлатӣ, эҳтиром гузоштан ва иззати модарро ба ҷо овардан, тарғиби либосҳои миллӣ баҳри муаррифии фарҳанги миллӣ ва дурӣ ҷустан аз фарҳанги бегона мусоидат менамоянд. Ин ҷавони ватандӯст рисолати худро хизмат ба халқу ватан, татбиқи сиёсати давлатии ҷавонон ва амалӣ намудани ҳадафҳои созандаи давлату Ҳукумат маънидод мекунад.

Субҳиддин ҚОДИРОВ, “ҶТ”