Дар соли 2025 шумораи умумии хатсайрҳои хизматрасонидашуда дар Фурудгоҳи байналмилалии Душанбе 8821 ададро ташкил медиҳад, ки ин шумора нисбат ба соли 2024 603 адад зиёд мебошад.

Дар ин бора Зайнулло Шарифзода, директори ҶСК "Фурудгоҳи байналмилалии Душанбе" зимни нишасти хабарӣ иттилоъ дод.

Бо вуҷуди зиёд шудани парвозҳо гуфта шуд, ки шумораи мусофирон дар соли қабл кам шудааст. Соли гузашта аз ҷониби ин фурудгоҳ ба 2 млн 160 ҳазору 248 мусофир хизмат расонида шудааст, ки нисбат ба соли 2024 115 ҳазору 700 мусофир кам мебошад.

Ҳамчунин, зикр гардид, ки дар ин давра 2197 теъдоди ҳодисаҳои батаъхирмонии парвозҳо ба қайд гирифта шудааст, ки нисбат ба соли 2024 126 парвоз зиёд мебошад.

Омилҳои асосии ба таъхир гузоштани парвозҳо дар Фурудгоҳ дер омадани ҳавопаймо аз фурудгоҳи макони парвоз, номусоидии обу ҳаво, дахолати ширкатҳои ҳавопаймоӣ, сарҳад ва ғайраҳо мебошад.

Сайёраи ҚИЁМИДДИН, “ҶТ”