Нақшаи қабул ба Донишгоҳи давлатии тиҷорати Тоҷикистон барои соли таҳсили 2025-2026 97,6% иҷро гардид.

Ин нуктаро Назарзода Хайрулло, ректори Донишгоҳ зимни нишасти хабарӣ имрӯ - 27 январ иброз дошта, аз ҷумла қайд намуд, ки Донишгоҳ бо мақсади дар сатҳи зарурӣ омода намудани мутахассисон робитаи илмро бо истеҳсолот қавӣ гардонидааст ва дар ин самт алҳол кафедраҳои тахассусии Донишгоҳ дар назди муассиса ва ташкилоту корхонаҳо фаъолият карда истодаанд.

Ҳамчунин, гуфта шуд, ки барои соли таҳсили 2025-2026 дар Донишгоҳи давлатии тиҷорати Тоҷикистон 4 ихтисоси нав: иқтисодиёт ва идора дар корхона, муносибатҳои байналмилалӣ, таъмини иқтисодии фаъолияти гумрукӣ, дизайн ва графикаи компютерӣ кушода шуд. Аз ҷумла, кафедраи технологияи рақамӣ дар иқтисодиёт низ таъсис дода шуд, ки ба он ихтисосҳои бизнеси электронӣ, дизайн ва графикаи компютерӣ, технология ва низоми иттилоотӣ дар иқтисодиёт вобаста карда шудааст.

Дар идома зикр гардид, то имрӯз Донишгоҳ бо муассисаҳои таҳсилоти олии касбии хориҷӣ беш аз 58 созишномаи ҳамкорӣ ба имзо расонида, айни замон дар Донишгоҳ 14 нафар донишҷӯи хориҷӣ дар ихтисосҳои гуногун таҳсил менамоянд.

Шаҳло ЭШОНОВА, “ҶТ”