Донишгоҳи давлатии тиббии Тоҷикистон ба номи Абуалӣ ибни Сино дар соли 2025 бо муассисаҳои илмӣ ва таълимиву табобатии мамолики хориҷ 15 созишномаи нави ҳамкорӣ ва ёддошти тафоҳум ба имзо расонидааст. Ин нукта имрӯз-26 январ дар нишасти хабарии Донишгоҳи давлатии тиббии Тоҷикистон ба номи Абуалӣ ибни Сино зикр гардид.

Гуфта шуд, ки ҳадаф аз он таҳкими ҳамкориҳо бо муассисаҳои таълимӣ, илмӣ ва табобатии хориҷи кишвар ва амалисозии лоиҳаҳои илмии муштарак буда, аз ҷумла бо Донишгоҳи Лакнави Ҳиндустон, Пажӯҳишгоҳи миллии муҳандисии генетикӣ ва биотехнологияи Ҷумҳурии Исломии Эрон, Беморхонаи кӯдаконаи Ҷумхурии Мардумии Чин ва Ширкати чинии "Mygenestics Technology" созишнома ва ёддошти тафоҳум ба тасвиб расонида шуд.

- Дар доираи созишномаҳои ҳамкорӣ ва ёддошти тафоҳум лоиҳаҳо омода гардида, такмили ихтисоси омӯзгорон, мубодилаи академии донишҷӯёну омӯзгорон, тадқиқотҳои илмӣ ба роҳ монда шуд, ки ин иқдомҳои нав дар ташаккули иқтидори кадриву илмии Донишгоҳ ва боз ҳам баланд бардоштани сатҳи тайёр кардани мутахассисони соҳаи тандурустӣ саҳми арзанда мегузорад,-гуфт Муҳиддин Нуриддин, ректори Донишгоҳ.

Таъкид шуд, ки дар маҷмуъ, Донишгоҳ бо 101 муассисаи таълимию илмӣ ва табобатии кишварҳои хориҷӣ ҳамкорӣ дорад.

Гулафшон КАРИМОВА,"ҶТ"