Аз 1 то 31 октябри соли равон дар саросари кишвар эмгузаронӣ бар зидди вируси папилломаи одам доир мегардад. Дар ин бора аз Вазорати тандурустӣ ва ҳифзи иҷтимоии аҳолии Тоҷикистон хабар доданд.

Ба иттилои манбаъ иммунизатсия ё эмгузаронӣ бар зидди вируси папилломаи одам бо Қарори Ҳукумати Ҷумҳурии Тоҷикистон , ки аз 24 июли соли 2025 таҳти №408 тасдиқ шудааст, гузаронида мешавад.

Эмугзаронӣ бар зидди вируси папилломаи одам, ки бо ваксинаи “Гирдасил” гузаронида мешавад, дар давраи аввал духтарони 10 соларо фаро мегирад. Ба иттилои масъулини Вазорати тандурустӣ дар давраҳои баъдӣ духтарони синни 11 то 14 сола низ ба эмгузаронӣ фаро гирифта хоҳанд шуд.

Гуфта мешавад, ки навъи ваксинаи “Гирдасил” дар Иёлоти Муттаҳидаи Амрико истеҳсол шуда, қадами муҳим дар самти пешгирии саратони гарданаки бачадон маҳсуб меёбад. Ваксина зиёда аз 20 сол мешавад, ки дар мамлакатҳои гуногуни ҷаҳон истифода шуда, самаранокии худро собит намудааст.

Ёдовар мешавем, ки тибқи маълумоти тиббӣ, вируси папиломаи одам омили асосии пайдоиши саратони гарданаки бачадон буда, ин беморӣ дар байни беморони саратон (занон) дар Тоҷикистон мавқеи дуюмро ишғол мекунад.

М. МУҚАДДАМОВА, “ҶТ”