Дар доираи барномаҳои ободонӣ ва зебоии муҳити зист дар нимсолаи аввали соли ҷорӣ дар шаҳру ноҳияҳои кишвар зиёда аз 1,2 миллион бех гул шинонда шудааст.

Дар ин бора 22 июл Шарифҷон Ҷумъазода, раиси Кумитаи рушди маҳали назди Президенти Ҷумҳурии Тоҷикистон зимни нашасти хабарӣ иттилоъ дод.

- Ҳамаи ин гулҳо маҳсулоти маҳаллӣ буда, дар ниҳолпарвархонаҳои дохилӣ парвариш ёфтаанд. Маблағи умумии хароҷот барои шинондани гулҳо 5,8 миллион сомониро ташкил дода, он аз ҳисоби буҷетҳои маҳаллӣ ва саҳми соҳибкорон таъмин шудааст, - гуфт раиси Кумита.

Ҷумъазода таъкид кард, ки истифодаи гулҳои маҳаллӣ на танҳо ба зебоии шаҳрҳо мусоидат мекунад, балки барои рушди иқтисоди маҳаллӣ ва фароҳам овардани ҷойҳои нави корӣ низ муҳим аст.

З. ҚОСИМОВА, “ҶТ”