Соли 2025 дар Тоҷикистон 46 ҳодисаи нохуш ва 1 садамаи истеҳсолӣ ба қайд гирифта шуда, дар натиҷаи он 40 нафар ҳалок ва 27 нафар ҷароҳатҳои ҷисмонӣ бардоштаанд.

Дар ин бора 27 январ Раҳим Санъат сардори Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон зимни нишасти хабарӣ иттилоъ дод.

Ба гуфтаи сардори Хадамот сабабҳои асосии рух додани ҳодисаҳои нохуш риоя нагардидани қоидаҳои бехатарии саноатӣ, беэътиноии муҳандисони техникӣ ҳангоми кор бо объектҳои хатарнок, иҷро нашудани технологияҳои коркарди кон ва норасоии мутахассисони соҳавӣ мебошад.

Ӯ инчунин қайд кард, ки вобаста ба ҳолатҳои ошкоршуда нисбати 40 нафар шахсони ҳуқуқӣ, мансабдор ва воқеӣ чораҳои маъмурӣ андешида шуда, онҳо ҷаримабандӣ шуданд. Маблағи умумии ҷаримаҳо 211 ҳазору 500 сомониро ташкил додааст.

Инчунин, гуфта шуд, ки ба 67 нафар зарардида ва ба хонаводаҳои 40 нафар фавтида, аз ҷониби корхонаҳо, иттифоқҳои касаба ва шахсони воқеӣ тибқи Кодекси меҳнати Ҷумҳурии Тоҷикистон кумакпулии яквақта ва кумакҳои молӣ ба маблағи умумии 7 миллиону 852 ҳазору 525 сомонӣ пардохт шудааст.

Фарзонаи УМАРАЛӢ, “ҶТ”