17-уми сентябр раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад аз Мактаби варзиши вилояти Суғд дар шаҳри Хуҷанд боздид намуд.

Раиси Кумита зимни боздид бо шароити машғулияти варзишгарон, толорҳои таълимӣ, шароити будубош ва инфрасохтори мавҷуда аз наздик ошно гардида, ҳамчунин бо мураббиён ва варзишгарони муассиса мулоқот ороста, оид ба дастовардҳо, мушкилот ва дурнамои фаъолияти онҳо суҳбат анҷом дода шуд.

Раиси Кумита зимни суҳбат таъкид намуд, ки дастгирии ҳаматарафаи варзишгарон ва беҳтар намудани шароити зисту тамрини онҳо яке аз самтҳои муҳими фаъолияти Кумита маҳсуб меёбад. Зимнан зикр гардид, ки бо шарофати сиёсати хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон варзишгарони тоҷик дар арсаи байналмилалӣ ҷойгоҳи сазовор пайдо намуда, парчами давлатро бо ифтихор боло мебардоранд.

Дар рафти суҳбат мураббиёну варзишгарон изҳор доштанд, ки бо дастгирии Ҳукумати кишвар ва шароити фароҳамгардида барои боз ҳам беҳтар ба роҳ мондани омодагиҳо ва дастёбӣ ба натиҷаҳои баланд талош хоҳанд кард.

“ҶТ”