Дар ноҳияи Ҷаббор Расулов бунёду навсозии якчанд иншооти иҷтимоӣ ба муносибати Ҷашни 35-солагии Истиқлоли давлатӣ идома дорад. Дар ин хусус АМИТ “Ховар” иттилоъ медиҳад.

Тибқи иттилоъ, дар деҳаи Тоҷикободи Ҷамоати деҳоти Гулхона бо саҳми сокинон сохтмони кӯдакистони замонавии дуошёна барои 120 кӯдак идома дорад ва дар назди он таъсиси майдончаи бозии кӯдакона пешбинӣ шудааст.

Инчунин, бо мақсади ҷалби бештари ҷавонон ба тарзи ҳаёти солим бунёди Қасри варзишии “Паҳлавонони Суғд” ба нақша гирифта шудааст.

Дар доираи корҳои ободонию созандагӣ инчунин таъмири пурраи шуъбаҳои Беморхонаи марказии ноҳия анҷом ёфта, муассиса бо таҷҳизоти муосири тиббӣ таъмин гардид. Сохтмони маркази ташхисию табобатии “Луқмони Ҳаким” дар шаҳраки Меҳробод идома дошта, дар он шуъбаҳои ташхису ҷарроҳӣ ҷойгир карда мешаванд.

Дар ноҳия корҳои ободонӣ бо саҳми мақомоти маҳаллӣ ва соҳибкорон идома дошта, барои беҳтар гардидани шароити зиндагии сокинон заминаи мусоид фароҳам оварда мешавад.

Шаҳноза АЗИМОВА, “ҶТ”