Дар Мақомоти иҷроияи ҳокимияти давлатии Вилояти Мухтори Кӯҳистони Бадахшон ҷаласаи ҷамъбасти натиҷаҳои рушди иҷтимоию иқтисодии вилоят дар соли 2025 баргузор гардид.

Зикр гардид, ки дар ин давра ҳаҷми маҷмуи маҳсулоти дохилии вилоят ба 3 млрд 018 млн сомонӣ ва суръати рушди воқеии он ба 8,2 фоиз расонида шуд. Нақшаи қисми даромади буҷет бошад, бо дарназардошти андози иҷтимоии ғайрибуҷетӣ 104,3 фоиз иҷро ва ба ҷойи 271,8 млн сомонии нақшаи пешбинишуда ба буҷет 283,4 млн сомонӣ ворид шудааст, ки нисбат ба нақша 11,6 млн сомонӣ зиёд мебошад.

Тибқи иттилоъ, дар доираи амалисозии ҳадафи стратегии Ҳукумати кишвар оид ба вусъати саноатикунонии босуръат, ҳаҷми маҷмуи маҳсулоти саноатии вилоят дар ин давра ба 336,4 миллион сомонӣ расонида шуд, ки нисбати ҳамин давраи соли гузашта 29,3 млн зиёд мебошад. Суръати солонаи рушди соҳа бошад, дар сатҳи 9,5 фоиз таъмин гардид. Шумораи корхонаҳои саноатӣ дар шаҳри Хоруғ ва ноҳияҳо 191 ададро ташкил дода, соли 2025 54 корхонаю коргоҳ бо 320 ҷойи кории нав сохта мавриди истифода қарор дода шуданд. Ҳоло дар вилоят 13 НБО бо иқтидори 62,05 МВт фаъолият менамоянд, ки талаботи аҳолиро бо неруи барқ 97 фоиз таъмин намуда истодаанд. Соли 2026 бунёди 23 неругоҳи барқии офтобӣ дар ноҳияҳои Мурғоб, Шуғнон, Дарвоз ва Рушон бо иқтидори умумии 11,1 МВт ва 11 неругоҳи хурди барқии обӣ бо тавоноии 725 кВт дар нақша аст. Бо мақсади рушди “энергияи сабз” дар ноҳияи Шуғнон сохтмони неругоҳи барқи офтобӣ бо иқтидори 3 МВт идома дорад.

Дар идома қайд гардид, ки соли 2025 барои рушди соҳаи кор бо ҷавонон ва варзиш бо дастгирии Мақомоти иҷроияи ҳокимияти давлатии вилоят, шаҳру ноҳияҳо ва ҷалби соҳибкорону шахсони саховатпеша 22 адад майдончаи варзишӣ сохта ба истифода дода шуд.

Варзишгарони ВМКБ дар зиёда 15 мусобиқаи байналмилалӣ, 59 сабқат ва чемпионатҳои сатҳи ҷумҳуриявӣ иштирок карда, сазовори 341 медал, аз ҷумла 101 медали тилло, 104 нуқра ва 136 медали биринҷӣ гардиданд.

Дар идомаи ҷаласа раиси ВМКБ Мирзонабот Алишер Худоберди ва Котиби Шурои амнияти Ҷумҳурии Тоҷикистон Юсуф Раҳмон Аҳмадзод вобаста ба татбиқи супоришу ҳидоятҳои Роҳбари давлат ва таъмини саривақтии нишондодҳои рушд дар назди масъулин вазифаҳои мушаххас гузоштанд.

Аз ҷумла гуфта шуд, ки чорабинии аз ҳама муҳими соли 2025, ки дар сатҳи баланди сиёсиву ташкилӣ ва фарҳангию маърифатӣ доир гардид, ин ташрифи Пешвои миллат, Ҷаноби Олӣ муҳтарам Эмомалӣ Раҳмон ба шаҳру ноҳияҳои вилоят ҳисобида мешавад.

Таъкид шуд, ки дар доираи нақша-чорабиниҳои таҷлили сазовор аз 35-умин солгарди Истиқлоли давлатӣ то имрӯз 1469 бо назардошти иншооти иловагӣ ба маблағи 5,2 млрд сомонӣ бунёд ва ба истифода дода шуданд, ки 107 фоизи иҷрои бандҳои нақшаро ташкил медиҳад. То рӯзи ҷашни ин санаи муқаддас боз даҳҳо иншооти дигар мавриди баҳрабардорӣ қарор хоҳанд гирифт. Аз теъдоди умумии иншооти ҷашнӣ 175 корхонаи саноатӣ мебошанд.

- Соли 2026 аз ҷониби Пешвои миллат - “Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ” эълон гардидааст, - гуфт раиси вилоят ва афзуд: - Моро зарур аст бо дарки масъулияти баланди касбӣ ва мавқеи устувори шаҳрвандӣ дар ҳамдастӣ бо мардуми заҳматкашу сарбаланд ва ба ору номуси Бадахшон, камари ҳимматро ҷиҳати боз ҳам пешрафта намудани Ватани азизамон маҳкам карда, баҳри боз ҳам обод сохтани Тоҷикистони азиз, таҳти сиёсати бунёдкоронаи Пешвои миллат муҳтарам Эмомалӣ Раҳмон, бо дастгири Ҳукумати Ҷумҳурии Тоҷикистон меҳнати содиқонаву софдилона намоем.

Садоншо ҶАНОБИЛШОЕВ, “ҶТ”