Дар МД “Кохи Рӯдакӣ”-и шаҳри Хуҷанд ба ифтихори 29-умин солгарди Рӯзи Ваҳдати миллӣ ҷамъомади бошукӯҳи идона баргузор гардид, ки дар он собиқадорони меҳнат, барқароркунандагони сохти конститутсионӣ, аҳли илму адаб ва фаъолони ҷомеи меҳнатӣ аз шаҳру ноҳияҳои вилояти Суғд иштирок намуданд.

Раҷаб Аҳмадзода, раиси вилояти Суғд зимни суханронӣ иброз дошт, ки 27-уми июни соли 1997 бо ба имзо расидани Созишномаи умумии истиқрори сулҳ ва ризоияти миллӣ дар таърихи навини давлатдории мо саҳифаи нав боз шуд.

Тавре зикр гардид, дар натиҷаи сиёсати дурнигарона ва хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ваҳдату ҳамдилӣ ба даст омада, халқи тоҷик дар тамоми гӯшаву канори мамлакат ба ҳам омаданд. Нақши Ваҳдати миллӣ ҳамчун дастоварди бузурги мардуми шарифи Тоҷикистон дар муттаҳид намудани ҳамватанон ва аз хатари нобудӣ наҷот бахшидани давлати навини тоҷикон беназир маънидод гардид.

-Дар рӯзҳои таҷлил аз солгарди навбатии Ваҳдати миллӣ боз як рӯйдоди муҳиму фараҳбахш ба вуқуъ пайваст, яъне 25-уми июни соли равон бо ташаббуси Пешвои миллат муҳтарам Эмомалӣ Раҳмон бо ҷонибдории ҷомеаи ҷаҳонӣ Маҷмааи умумии Созмони Милали Муттаҳди қатънома дар бораи “Даҳсолаи байналмилалӣ оид ба таҳкими сулҳ барои наслҳои оянда, 2027-2036”-ро қабул намуд, ки ин бори дигар аз бузургӣ, фарҳанги воло, сулҳу ваҳдатофарии миллати тоҷик ва хирадмандии Президенти Тоҷикистон башорат медиҳад, - таъкид намуд раиси вилояти Суғд.

Дар фарҷом ба ифтихори Рӯзи Ваҳдати миллӣ барномаи рангини фарҳангӣ, ки сулҳу дӯстӣ, ваҳдату ҳамдилӣ ва хизматҳои таърихии фарзанди фарзонаи миллат, Президенти Ҷумҳурии Тоҷикистон муҳтарам Эмомалӣ Раҳмонро таҷассум менамуд, пешниҳоди аҳли нишаст карда шуд.

Субҳиддин ҚОДИРОВ, “ҶТ”