Чанде пеш дар пойтахт даври аввали озмуни “Miss Dushanbe – 2026” ба анҷом расид. Ин озмун аввалин бор бо Қарори махсуси шаҳрдори Душанбе муҳтарам Рустами Эмомалӣ бахшида ба 35-умин солгарди Истиқлоли давлатӣ баргузор мегардад. Ҳадафи он ҳифзи арзишҳои давлатдорӣ, тарғибу таш-виқи либоси миллӣ ва баланд бардоштани завқи зебоипарастӣ, рушди соҳаи муд, дарёфт ва дастгирии чеҳраҳои нав, баланд бардоштани фарҳанги шаҳрнишинӣ мебошад.

Озмуни мазкур аз чор давр иборат буда, иштирокчиёни он бояд аз 17 то 28-сола, бо қади баландияш аз 165 то 185 см ва вазни аз 50 то 70 килограм бошанд.

Ғолибон аз рӯйи се номина – “Miss Dushanbe” (Зебосанами Душанбе), “Miss Intellect” (Зебосанами зирак) ва “Miss Popular Choice” (Зебосанами маҳбуби дилҳо) интихоб мегарданд.

Маблағи умумии озмун 1 миллион сомониро ташкил медиҳад.

Вобаста ба баргузории озмуни “Miss Dushanbe – 2026” бо яке аз аъзои ҳакамони даври аввал Ҳунарпешаи шоистаи Тоҷикистон Моҳпайкар Ёрова суҳбате анҷом додем.

- Ба назаратон чӣ омил шуд, то шаҳрдорӣ чунин иқдомеро рӯйи кор оварад?

- Ин озмун пеш аз ҳама ба хотири муҳайё кардани имкони муаррифӣ ба гулдухтарони тоҷик роҳандозӣ шудааст. Яъне, “Miss Dushanbe” метавонад бори дигар собит созад, ки духтари тоҷик натанҳо зебост, балки соҳиби ақлу хиради волост. Ӯ дар баробари зебо будан, хушсухану соҳибҳунар ҳам ҳаст. Ҳанӯз ҳам зиёданд духтароне, ки истеъдоду ҳунари худро пиҳон медоранд. Маҳз чунин озмунҳо боис мегардад, то онҳо кашф шаванд ва рушд ёбанд. Ҳар даври озмун талаботи худро дорад, ки осон ҳам нестанд. Яъне, иштирокчиён бояд на фақат зебо, балки босавод, сухангӯ, забондон ва соҳибистеъдод бошанд. Чун даври аввал ба анҷом расид ва шоҳид будем, ки ҳамаи духтарон бо як ҳадаф омада буданд ба озмун: шоиста муаррифӣ кардани духтари тоҷик. Бинобар ин, шахсан сипос мегӯям ба раиси шаҳри Душанбе муҳтарам Рустами Эмомалӣ бобати роҳандозии чунин озмун.

- Қаблан ҳам чунин озмунҳое дар шабакаҳои телевизионии кишвар баргузор мегардид ва дар яке аз онҳо низ ҳакамӣ кардаед. Тафовути “Miss Dushanbe – 2026” аз дигар озмунҳо дар чист?

- Дар лоиҳаи “Зебосанам”, ки чанд сол қабл баргузор гардида буд, мо зебосанамро аз тамоми Тоҷикистон интихоб карда будем. Яъне, сафар карда будем ба вилоятҳо, он ҷо иштирокчиёнро қабул кардем. Аммо дар ин озмун зебосанам танҳо аз пойтахт интихоб мешавад. Баъзе аз шартҳо албатта монанданд ба ҳамдигар, чунки ҳарду озмуни зебоиянд, аммо ин ҷо боз шартҳои дигар низ ҳастанд, ки духтаронро бештар кашф месозанд. Як чизи дигарро дарк кардам, ки нисбат ба он чанд соли қабл тарзи гуфтор, рафтор, тарзи либоспӯшии духтарон хубтару беҳтар гардидааст. Ин аз он далолат медиҳад, ки мавқеи зан дар ҷомеа баланд шуда истодааст ва духтари тоҷик бештар аз пештар ҳис мекунад, ки дар рушди миллат саҳмгузор аст.

- Дар даври интихобии озмун чанд довталаб ҳуҷҷатсупорӣ карданд ва чӣ қадар роҳ ёфтанд ба марҳилаи баъдӣ?

- Дар умум зиёда аз 500 нафар дар ин давр иштирок карда буданд. Ин ҳам новобаста аз он ки дар як давраи кӯтоҳ таблиғ гардида буд. Аз ин шумора албатта танҳо як адади махсус ба даври баъдӣ роҳ ёфт. Ҳамин гуна ҳар давр боз шартҳои мушкилтар дорад ва ин шумора камтар шудан мегирад.

- Табиист, ки бобати баргузории ҳар озмун баҳсҳо зиёданду оид ба сурат гирифтани ноадолатӣ дар ҳар яке аз онҳо гуфта мешавад. Чунин ҳолатҳоеро ҳис кардед дар рафти баргузории даври аввал?

- На. Мо ва тамоми гурӯҳи корӣ танҳо аз рӯйи адолату мутобиқ ба шартҳои озмун даври аввалро гузаронидем. Буданд ҳолатҳое, ки норозигӣ ба миён меомад, аммо мо-доварон танҳо аз рӯйи талаботи озмун амал мекардем. Масалан, духтароне буданд, ки 1 ё 2 см қадашон пасттар аз шарти зикршуда буд, вале мо қабул накардем. Рӯзҳое буданд, ки волидони иштирокчиён бо мо ҷангу даъво мекарданд, ки чаро духтари моро интихоб накардед. Мо ба онҳо шартҳои озмунро гуфта мефаҳмонидем, ки маҳз бо ҳамин сабабҳо духтари онҳо ба даври дигар роҳ наёфт. Чун назди мо ин масъулиятро гузоштаанд, пас бояд онро бо виҷдону инсоф анҷом диҳем.

- Ҳарчанд озмун низомнома ва талаботи махсуси худро дорад, аммо дар баробари ин худи шумо дар интихоби иштирокчиён ба кадом сифатҳо диққат медиҳед?

- Талаботи ман ҳамон талаботҳои зикршуда дар озмун аст. Ман ҳам намеписандам вақте як духтари ҷавон зиёд ороиш мекунад. Ҳамон ҳусни табиии ӯ пушти ороиш пинҳон мемонад ва ӯро аз солаш бузургтар нишон медиҳад. Ба ин ҷиҳат мо диққати ҷиддӣ додем ва аз ҳамаи онҳое, ки бо ороиш омада буданд, хоҳиш кардем онҳоро пок кунанд.

- Воқеан, “Зебоии табиӣ” яке аз шартҳои озмун таъкид шудааст. Пас, онҳоеро интихоб кардед, ки аслан тағйири чеҳра накарда буданд?

- Бале. Кӯшиш кардем, то дар чеҳраҳои онҳо қошу мижаву лабҳои сунъӣ набошад. Аммо чанде аз онҳо ки каме истифода карда буданд, то даври баъдӣ бояд ҳатман онҳоро гиранд. Чун ман ҳам зиёд сар дар намеорам аз чунин ботоксу ҷарроҳиҳои рӯй, вале мутахассисон буданд он ҷо, ки ҳамаро назорат карда, аниқ намуданд. Бо боварӣ метавонам бигӯям, ки қариб 90 фоизи духтарон бо ҳусни табиӣ буданд.

- Моделон, ҳунармандон, блогерон, ороишгарон ва дигар нафарони шинохта низ метавонистанд иштирок кунанд?

- Албатта. Иштирок барои ҳама озод буд. Мо дар миёни довталабон чунин духтаронро ҳам доштем. Аммо албатта онҳое, ки бо нафъ расонидан ба ҷомеа машҳуранд.

- Дар давраҳои баъдӣ аъзои ҳакамон тағйир меёбанд?

- Бале. Аммо феълан намедонам киҳо даврҳои баъдиро ҳакамӣ мекунанд.

- 1 миллион сомонӣ харҷи ин озмун мешавад. Ба назаратон арзанда аст?

- Арзанда аст. Бояд гуфт, тадорукот аз ҷониби шаҳрдорӣ дар сатҳи олӣ аст. Барои иштирокчиён ҳама шароит муҳайё гаштааст.

- “Miss Dushanbe – 2026” дар оянда чӣ рисолат дошта метавонад?

- Вазифаҳои ӯ зиёд мешавад. Дар чорабиниҳои идона, фарҳангӣ ва хайриявӣ иштирок мекунад. Шояд барои муаррифии духтари тоҷик дар чорабиниҳои берун аз кишвар низ ҷалб гардад. Яъне, ӯ чеҳраи пойтахт мегардад.

Сайёраи ҚИЁМИДДИН, "ҶТ"