14 октябр дар толори маҷлисгоҳи Кумитаи кор бо ҷавонон ва варзиши назди Ҳукумати Ҷумҳурии Тоҷикистон дарси навбатии маҳфили омӯзишии “Пайравони Пешвои миллат” баргузор гардид.

Дар чорабинӣ Гулаҳмадзода Зулфиқор Аҳмад, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Аҳтамзода Абдуалим, мудири шуъбаи корҳои дин, танзими анъана ва ҷашну маросимҳои Мақомоти иҷроияи ҳокимияти давлатии шаҳри Душанбе ва шунавандагони курси омӯзишӣ ширкат варзиданд.

Маҳфил бо сухани ифтитоҳии раиси Кумита Гулаҳмадзода Зулфиқор Аҳмад оғоз гардид. Ӯ иштирокчиёнро бо мақсад ва аҳаммияти баргузории чунин маҳфилҳои омӯзишӣ шинос намуда, таъкид кард, ки ташаккули ҷаҳонбинии миллӣ ва эҳсоси худшиносиву ватандӯстӣ миёни ҷавонон яке аз самтҳои асосии фаъолияти Кумита ба ҳисоб меравад.

Сипас, Аҳтамзода Абдуалим дар мавзӯи “Нақши ҷавонон дар таҳкими арзишҳои миллӣ ва риояи анъанаву суннатҳои неки миллӣ” баромад намуда, изҳор дошт, ки ҷавонон ҳамчун қувваи созанда бояд дар ҳифзу инкишофи арзишҳои фарҳангиву маънавӣ ва иҷрои сиёсати пешгирифтаи Пешвои миллат саҳми фаъол дошта бошанд.

Дар рафти маҳфил иштирокчиён суолу ҷавоб ва мубоҳисаҳои судманд анҷом дода, андешаҳои худро дар бораи нақши ҷавонон дар рушди ҷомеа, худшиносӣ ва пешбурди тарзи ҳаёти солим баён намуданд.

Дар интиҳои чорабинӣ аз ҷониби роҳбарияти Кумита ба ҷавонон барои иштироки фаъол ва ибрози андешаҳои созанда изҳори сипос карда шуд. Таъкид гардид, ки чунин маҳфилҳои омӯзишӣ минбаъд низ дар самти боло бурдани маърифати сиёсӣ, ҳуқуқӣ ва ватандӯстии ҷавонон мунтазам баргузор хоҳанд шуд.

Дар фарҷом аз ҷониби раиси Кумита ба Аҳтамзода Абдуалим туҳфаи махсус бо рамзи маҳфил тақдим карда шуд.

“ҶТ”