Имрӯз дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон мулоқоти муовини якум ва муовини раиси Кумита Шабнам Раҳимзода ва Сураҷ Чоршанбезода бо иштирокчиёни Фестивали ҷумҳуриявии “Дӯстии ҷавонон”, ки дар шаҳру ноҳияҳои тобеи ҷумҳурӣ баргузор мешавад, баргузор шуд.

Зимни мулоқот оид ба нақши ҷавонон дар рушди ҷомеа, таҳкими Ваҳдати миллӣ ва густариши дӯстиву ҳамдигарфаҳмӣ миёни насли ҷавон андешарониҳо сурат гирифта, таъкид кард, ки баргузории чунин чорабиниҳо барои таҳкими робитаҳои фарҳангӣ ва иҷтимоии ҷавонон заминаи мусоид фароҳам меорад.

Ҳамзамон, иштирокчиёни фестивал вобаста ба сиёсати давлатии ҷавонон, фароҳамсозии шароити мусоид барои таҳсилу фаъолият ва ҷалби ҷавонон ба корҳои созандагиву ободонӣ ибрози назар намуданд.

Ёдовар мешавем, ки Фестивали ҷумҳуриявии “Дӯстии ҷавонон” аз 25 то 30 июн бахшида ба 29- умин солгарди Ҷашни Ваҳдати миллӣ дар шаҳру ноҳияҳои Файзобод, Роғун, Нуробод, Рашт, Тоҷикобод ва Лахш баргузор мегардад. Он бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо мақомоти иҷроияи ҳокимияти давлатии шаҳру ноҳияҳои болозикр баргузор хоҳад шуд.

“ҶТ”