МУАЛЛИФ: БЕҲРӮЗ ХОЛМУРОДОВ

Дар доираи чорабиниҳои Соли ҷавонон, бо ташаббуси Кумитаи ҷавонон, варзиш ва сайёҳии назди Ҳукумати ҷумҳурӣ (КҶВС) дар мавзӯи “Рушди малакаи касбии мудирони шуъбаҳои кор бо ҷавонони муассисаҳои таҳсилоти олии касбӣ дар татбиқи сиёсати давлатии ҷавонон” семинари омӯзишӣ баргузор гардид.

Омӯзиш ва шарҳи низомномаи намунавии мудирони шуъбаҳои кор бо ҷавонони муассисаҳои таҳсилоти олии касбӣ, тарзи баргузории озмунҳои ҷумҳуриявӣ дар муассисаҳои таҳсилоти олии касбӣ, риояи низомномаи озмунҳо ва пешниҳоди номзади арзанда ба даври ниҳоӣ ва тартиби таҳияи лоиҳаҳо ҳангоми банақшагирии чорабиниҳо дар самти татбиқи сиёсати давлатии ҷавонон мавриди баррасӣ қарор гирифт.

Аҳмадзода Дилноза, муовини раиси КҶВС иброз дошт, ки тибқи маълумоти оморӣ беш аз 3 млн. нафар аҳолии кишварро насли ҷавони аз 14 то 30-сола ташкил менамояд, ки 227 ҳазор нафар донишҷӯён мебошанд.

Гуфта шуд, ки мудирони шуъбаҳои кор бо ҷавонони муассисаҳои таҳсилоти олии касбӣ дар татбиқи сиёсати давлатии ҷавонон бояд саҳм гузоранд. Бояд кӯшиш намуд, ки Соли ҷавононро бо сарбаландӣ ва нишондиҳандаҳое, ки Пешвои миллат дар Паёмашон ба Маҷлиси Олӣ ироа кардаанд, татбиқ созем.