Имрӯз дар шаҳри Душанбе таҳти унвони “Ҷавонон – пайравони Пешвои миллат” ҳамоиши ҷавонони соҳаи меҳнат, муҳоҷират ва шуғли аҳолии Ҷумҳурии Тоҷикистон баргузор гардид.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Тибқи иттилоъ, ҳамоиш таҳти раёсати Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Насим Каримзода, муовини якуми вазири меҳнат, муҳоҷират ва шуғли аҳолии Ҷумҳурии Тоҷикистон доир шуда, дар он ҷавонону фаъолони Вазорат иштирок намуданд.

Нахуст раёсат аз гӯшаи намоишгоҳи дастовардҳои ҷавонони соҳаи меҳнат, муҳоҷират ва шуғли аҳолии кишвар дидан намуда, бо садо додани Суруди миллӣ ҳамоиш ба кори худ оғоз намуд.

Зимни суҳбат дарҷ шуд, ки ҷавонон хазинаи тиллоии миллат буда, дар ҳама ҷабҳаҳои иқтисодиёту иҷтимоиёти кишвар саҳми беандоза доранд. Сиёсати давлатии ҷавонон аз лаҳзаҳои нахустини соҳибистиқлолии мамлакат дар меҳвари сиёсати иҷтимоии Ҳукумат қарор дошта, ҷавонон тавонистанд, ки миллату давлатро дар арсаи ҷаҳонӣ бо дастовардҳои варзишӣ, илмӣ ва ҳунарӣ муаррифӣ намоянд.

Дар охир ба фаъолон сипоснома ва туҳфаҳои варзишӣ супорида шуд.

“ҶТ”