ҶАВОНОН
Шанбе 22 Июн 2024 11:05
10144
Кормандони мақомоти милитсияи шаҳри Душанбе 7 ноболиғро барои вайрон кардани тартиботи ҷамъиятӣ боздошт карданд.

Дар ин бора аз дафтари матбуоти Раёсати Вазорати корҳои дохила дар шаҳри Душанбе хабар доданд.

Тавре иттилоъ дода шуд, ноболиғонро дар асоси як навори дар шабакаҳои иҷтимоӣ нашр гардида боздошт карданд.

Гуфта мешавад онҳо хонандагони Муассисаи таҳсилоти миёнаи умумии №91 шаҳри Душанбе буда, 2-юми апрели соли ҷорӣ, тахминан соати 12:30 дақиқа, дар кӯчаи Гипрозем, дар назди МТМУ №91 ноҳияи Сино бо ҳамдигар муноқиша намуда, тартиботи ҷамъиятиро дағалона вайрон мекунанд.

“Вобаста ба ҳолати мазкур нисбати волидайни 7-нафар ноболиғ тибқи талаботи моддаи 90 Кодекси ҳуқуқвайронкунии маъмурии Ҷумҳурии Тоҷикистон протоколи маъмурӣ тартиб дода шуда, барои чораҷӯӣ ба суд ирсол карда шуд”, - гуфтанд аз Раёсати ВКД дар шаҳри Душанбе.

Ёдовар мешавем, ки дар асоси моддаи 90 Кодекси ҳуқуқвайронкунии маъмурии Ҷумҳурии Тоҷикистон “барои аз тарафи падару модар ё дигар намояндагони қонунии ноболиғон, омӯзгор ё дигар корманди муассисаи таълимӣ ё тарбиявӣ, инчунин шахсе, ки дар асоси шартнома кӯдакро тарбия мекунад, иҷро накардани ӯҳдадориҳои парасторӣ, тарбиявӣ, таълимӣ, ҳимояи ҳуқуқ ва манфиатҳои ноболиғон ҳангоми набудани аломати ҷиноят” огоҳӣ ё ба андозаи аз се то панҷ нишондиҳанда барои ҳисобҳо ҷарима таъйин карда мешавад.

Эзоҳи худро нависед



Рамзҳо дар расм