Ҷавонон сутуни асосии давлату миллатанд. Маҳз онҳо бо ақлу дониш ва неруи тозаи худ метавонанд ҷомеаро ба сӯи пешрафт раҳсипор кунанд. Нақши ҷавонон дар рушди кишвар ва таҳкими пояҳои Истиқлоли давлатӣ рӯз то рӯз назаррас мегардад.

Доир ба дастовардҳои ҷавонони маҳал ва саҳми онҳо дар пешрафти кишвар бо яке аз ҷавонони пешсаф, сардори Раёсати кор бо ҷавонон ва варзиши Вилояти Мухтори Кӯҳистони Бадахшон Солеҳҷон Амирҷонзода мусоҳиба оростем.

- Пешравӣ ва дастовардҳои асосии ҷавонони ВМКБ - ро дар соли 2025 чӣ гуна арзёбӣ мекунед?

- Соли 2025 фаъолияти Раёсати кор бо ҷавонон ва варзиши ВМКБ дар асоси Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон”, “Консепсияи миллии сиёсати давлатии ҷавонон”, “Стратегияи сиёсати давлатии ҷавонон то соли 2030” ва дигар санадҳои меъёрӣ-ҳуқуқӣ роҳандозӣ гардид. Албатта, соли 2025 барои ҷавонони ВМКБ соли дастовардҳои назаррас ва фаъ-олияти созанда буд. Ҷавонони вилоят дар самтҳои гуногун: илм, маориф, фарҳанг, варзиш ва соҳибкорӣ пешрафтҳои намоён нишон доданд. Дар ин давра беш аз 200 ташаббуси ҷавонон амалӣ гардида, даҳҳо чорабинии тарбиявию маърифатӣ баргузор шуд ва теъдоди зиёди ҷавонон дар барномаҳои рушди иқтисодӣ иштирок намуданд. Дар маҷмӯъ, метавонем бигӯем, ки соли 2025 соли рушд ва фаъолшавии ҷавонони ВМКБ буд. Бо супориши Кумитаи кор бо ҷавонон ва варзиш баҳри фаҳмонидани Паёми Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ба Маҷлиси Олӣ аз моҳи январ то имрӯз 33 вохӯрӣ бо ҷавонони синни 16 то 35-сола доир гардида, дар ин мулоқотҳо Паём пурра шарҳ дода шуд.

- Дар соли равон ҷавонони вилоят бештар дар кадом самтҳо муваффақ гардиданд?

- Ҷавонони ВМКБ дар тамоми самтҳо фаъолияти назаррас доранд. Дар қатори дигар соҳаҳо, дар самтҳои инноватсия, соҳибкорӣ ва варзиш бештар рушд ёфтанд. Ҷавонони ВМКБ ба ташкили корхонаҳои хурду миёна рӯ оварда, дар бахши истеҳсоли маҳсулоти маҳаллӣ фаъолона саҳм мегузоранд. Ҳамчунин, дар соҳаи технологияҳои иттилоотӣ чандин лоиҳаҳои инноватсионии ҷавонон таъсис ёфтанд, ки имрӯз дар сатҳи ҷумҳурӣ шинохта шудаанд.

- Шумораи гирандагони стипендия дар ВМКБ чӣ қадар аст ва имсол ҷавонони ВМКБ дар олимпиадаҳо ва озмунҳои ҷумҳуриявию байналмилалӣ чӣ гуна натиҷаҳо ба даст оварданд?

- Айни ҳол дар вилоят 117 нафар гирандаи стипендия фаъолият доранд. Аз ҷумла, 85 нафар Стипендияи президентӣ, 11 нафар стипендияи раиси вилоят ва 21 нафар стипендияи ноҳиявӣ мегиранд.

Имсол ҷавонони ВМКБ дар олимпиадаҳо ва озмунҳои ҷумҳуриявию байналмилалӣ иштироки хуб карданд ва ба дастовардҳои арзанда ноил шуданд. Бо ифтихор метавон гуфт, ки хонандагон ва донишҷӯёни вилоят дар олимпиадаҳои фаннӣ ва озмунҳои ҷумҳуриявӣ бештар аз 40 медал ба даст оварданд, ки аз онҳо 10-тоаш тилло мебошад. Илова бар ин, се нафар ҷавонони вилоят дар озмунҳои байналмилалӣ дар самти технологияи иттилоотӣ ва робототехника соҳиби ҷойҳои ифтихорӣ шуданд. Ин ҳама далели сатҳи баланди донишу истеъдоди ҷавонони мост.

- Варзишгарони ҷавон соли 2025 дар кадом мусобиқаҳо ширкат варзиданд ва чӣ дастоварҳо доштанд?

- Имсол барои варзишгарони мо соли бобарор буд. Танҳо дар нимсолаи аввал варзишгарони вилоят дар мусобиқаҳои ҷумҳуриявӣ 223 медал ба даст оварданд, ки аз ин 66 адад тилло, 75 адад нуқра ва 82 адад биринҷӣ мебошад. Ҳамчунин, ду варзишгари ҷавони ВМКБ Тоҷикистонро дар мусобиқаи Осиёи Марказӣ муаррифӣ карда, соҳиби ҷойҳои дуюму сеюм гардиданд. Соли равон беш аз 290 чорабинии варзишӣ бо фарогирии 75 790 нафар, аз ҷумла 8395 зан, доир гардид. Дар вилоят 451 иншооти варзишӣ, аз ҷумла 73 толор, 269 майдонча ва 13 варзишгоҳ ва 3 қасри варзишӣ дар ноҳияҳои Дарвоз, Ванҷ ва Рӯшон ба истифода дода шуд. Бояд қайд кард, ки дар 11 мактаби варзишии ҳудуди вилоят 3432 варзишгар ба машқу тамрин фаро гирифта шудаанд. Аз рӯи нақшаи чорабиниҳо 131 мусобиқаи варзишӣ баргузор гардид, ки дар онҳо 5665 нафар варзишгар иштирок карданд.

Бори аввал дар таърихи ВМКБ Лигаи футболи калон байни шаҳру ноҳияҳои ВМКБ, лигаи футзал - байни идораву муассисаҳои вилоятиву шаҳрӣ ва лигаи волейбол байни шаҳру ноҳияҳои Хоруғ, Рошқалъа, Шуғнон ва Рӯшон баргузор гардида истодааст. Бояд қайд кард, ки лигаи волейболи ВМКБ ягона лигае мебошад, ки дар Ҷумҳурии Тоҷикистон фаъолият карда истодааст. Ғолибони лига моҳи декабр дар вазъияти тантанавӣ бо туҳфаҳои раиси фидератсияи футболи ВМКБ Мирзонабот Алишер Худобердӣ қадрдонӣ мегарданд.

- Дар самти шуғли ҷавонон чӣ корҳо ба анҷом расидаанд?

- Яке аз самтҳои муҳими фаъолияти Раёсат ҷалби ҷавонон ба шуғл мебошад. Дар доираи барномаҳои миллии рушди иҷтимоии ҷавонон барои солҳои 2022-2026 курсҳои омӯзишии қаннодӣ, компютер ва забони англисӣ амал мекунанд. Ин курсҳо ба ҷавонони бекор имкони соҳибкасб шуданро фароҳам меоранд.

- Ҷавонон дар корҳои ҷамъиятӣ, волонтёрӣ ва ободонӣ чӣ гуна саҳм мегузоранд ва тарғиби тарзи ҳаёти солим чӣ гуна ба роҳ монда шудааст?

- Ҷавонони ВМКБ дар корҳои ободонӣ, тозагии муҳит ва барномаҳои волонтёрӣ фаъолона иштирок мекунанд. Танҳо дар соли ҷорӣ зиёда аз 3 000 ҷавон дар аксияҳои “Шаҳри ман - хонаи ман” ва “Тозагӣ - кафили саломатӣ” иштирок намуданд.

- Барномаҳои тарбияи ватандӯстӣ ва ифтихори миллӣ миёни ҷавонон чӣ гуна пеш рафта истодааст ва дар самти тарбияи ватандӯстии ҷавонон чӣ корҳои мушаххас анҷом дода шуд?

- Айни замон барномаҳои “Ман тоҷик ҳастам”, “Мо фарзандони Ватанем” ва “Ифтихори миллӣ” дар тамоми шаҳру ноҳияҳо роҳандозӣ шудаанд. Ҷавонон бо завқи баланд дар ин чорабиниҳо ширкат меварзанд, ки нишондиҳандаи болоравии ҳисси ватандӯстии онҳост. Бояд хотиррасон намуд, ки вилоят дар давоми 8 соли охир пайваста нақшаи даъват ба сафи Қувваҳои Мусаллаҳи Ҷумҳурии Тоҷикистонро 100% иҷро намудааст. Дар соли 2025 низ ин нишондиҳанда пурра таъмин гардида, ҷавонони бо нангу номус сарбаландона адои хизмат менамоянд.

- Мушкили асосии ҷавонони вилоят дар соли 2025 чӣ буд?

- Бо вуҷуди дастовардҳои назаррас, соҳаи ҷавонон ва варзиш дар вилоят низ аз мушкилот холӣ нест. Аз ҷумла, набудани утоқҳои махсус барои волонтёрон, маблағгузории нокифояи барномаҳои соҳавӣ ва камбуди майдончаҳои стандартӣ барои мусобиқаҳои ҷумҳуриявӣ дар баъзе ноҳияҳо аз ҷумлаи онҳо мебошад. Бо вуҷуди ин, Раёсати кор бо ҷавонон ва варзиши ВМКБ кӯшиш мекунад, ки барои татбиқи саривақтии дастуру супоришҳои Ҳукумати Ҷумҳурии Тоҷикистон ва роҳбарияти Мақомоти иҷроияи ҳокимияти давлатии вилоят минбаъд низ талошҳои пайваста ба харҷ диҳад, то ҷавонони вилоят мисли ҳамешагӣ намунаи ҷавонони ватандӯст бошанд.

Малика МУҚАДАМОВА, “ҶТ”