Дирӯз - 13 май дар майдончаи варзишии маҳаллаи Носири Хусрави шаҳри Хоруғ ба хотири истиқбол аз қабул гардидани қатъномаи Маҷмаи Умумии Созмони Милали Муттаҳид оид ба эълон намудани 25 май ҳамчун Рӯзи ҷаҳонии футбол, ки аз ҷониби Президенти Ассотсиатсияи футболи Осиёи Марказӣ (CAFA), Президенти Федератсияи футболи Тоҷикистон муҳтарам Рустами Эмомалӣ пешниҳод шуда буд, чорабинии фарҳангӣ – варзишӣ баргузор гардид.

Дар он роҳбарияти вилояту шаҳр, кормандони идораву муассисаҳои давлатӣ, сохторҳои қудратӣ ва мақомотҳои ҳифзи ҳуқуқ, намояндагони қишри ҷавон, дӯстдорони бозии футбол, наварасону ҷавонон, варзишгарон ва донишҷӯён иштирок намуданд.

Баъди садо додани Суруди миллӣ раиси вилоят Мирзонабот Алишер Худобердӣ ҳозиринро бо ин руйдоди фараҳбахш табрику таҳният гуфта, зикр кард, ки пешниҳоди Рӯзи ҷаҳонии футбол аз иқдомҳои шоиста ва ташаббусҳои ҷаҳонии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маншаъ гирифта, нуфуз ва эътибори Тоҷикистони маҳбубро ҳамчун кишвари ташаббускор ва созанда дар ҳалли масъалаҳои мубрами башарият боз ҳам боло мебардорад.

“Бо иттифоқи оро қабул гардидани пешниҳоди Президенти Ассотсиатсияи футболи Осиёи Марказӣ, Президенти Федератсияи футболи Тоҷикистон муҳтарам Рустами Эмомалӣ оид ба таҷлили 25-май ҳамчун Рӯзи ҷаҳонии футбол гувоҳӣ аз он медиҳад, ки мо ҳамчун миллати тамаддуновар дар пайванди халқиятҳои гуногуни ҷаҳон ҳиссаи арзишманд дорем, барои таъмини сулҳу суботи тамоми олам саҳмгузор ва пешгом ҳастем”,-афзуд раиси вилоят.

Гуфта шуд, ки ҳанӯз дар ибтидои солҳои соҳибистиқлолии Тоҷикистон, таваҷҷуҳи Ҳукумати кишвар, хоса Пешвои муаззами миллат муҳтарам Эмомалӣ Раҳмон ба сиёсати давлатии ҷавонон, минҷумла рушди соҳаи варзиш равона гардида, дар ин самт як қатор барнома ва стратегия дар соҳаи кор бо ҷавонон ва махсусан рушди соҳаи варзиш қабул гардидаанд. Маҳз тавассути бунёди инфрасохтори соҳа, аз ҷумла майдону толорҳои калони варзишӣ, майдончаҳои хурди варзишӣ, таъсиси федератсияҳои намудҳои гуногуни варзиш, ташкили мусобиқаҳои варзишии сатҳи ҷаҳонӣ дар кишвар, иштироки варзишгарони ҷумҳурӣ дар олимпиада ва сабқатҳои байналмилалӣ, шароит ва имконияти васеъ барои рушди соҳа фароҳам оварда шуд.

Гуфта шуд, ки ҳоло дар қаламрави вилоят барои рушди футболи касбӣ бо дастгирии Ҳукумати мамлакат варзишгоҳи марказӣ ва маҷмааи варзишӣ дар шаҳри Хоруғ, варзишгоҳҳо дар марказҳои Ванҷу Роштқалъа ва бештар аз 30 толору майдончаҳои варзишӣ дар шаҳру ноҳияҳои вилоят мавриди истифода қарор дода шуда, ин иқдом дар оянда низ идома дода мешавад.

Роҳбарияти вилоят дар идомаи таъкид кард, ки мақомоти иҷроияи ҳокимияти давлатии вилоят барои рушди футбол, таъсиси лигаҳои алоҳида ва синфҳои махсуси футбол дар муассисаҳои варзишии шаҳру ноҳияҳо, баргузории чорабиниҳои варзишӣ аз намудани футбол омода намудани мураббиёни сатҳи олӣ тавассути ташкили курсҳои бозомӯзӣ, қабули барномаи алоҳидаи рушди футболи ВМКБ ва ҷалби наврасону ҷавонон ба футбол таваҷҷуҳи аввалиндараҷаро равона менамояд.

Сипас, барномаи фарҳангӣ манзури ҳозирин гардонида шуда, дар майдон бозии дӯстона байни дастаи мақомоти иҷроияи ҳокимияти давлатӣ ва сохторҳои қудратӣ аз намуди футбол доир шуд.

Садоншо ҶАНОБИЛШОЕВ,
“ҶТ”