Президенти Ассотсиатсияи футболи Осиёи Марказӣ (CAFA) муҳтарам Рустами Эмомалӣ дастаи мунтахаби футболбозони то 23 солаи Ӯзбекистонро , ки дар бозии финалии Ҷоми Осиё - 2024 ба даври ниҳоӣ расида, барои аввалин бор дар таърих ба Бозиҳои олимпӣ роҳхат гирифтанд, табрик кард.

Дар ин бора шабакаи телеграмии Рустами Эмомалӣ хабар дод.

Дар номаи табрикотии Рустами Эмомалӣ чунин зикр шудааст: “Дастаи мунтахаби то 23-солаи Узбекистонро, ки узви Ассотсиатсияи футболи Осиёи Марказӣ (CAFA) мебошад, барои ба Бозиҳои олимпӣ дар Париж роҳхат гирифтан самимона табрик карда, ҳамчунин дар бозии финалии Ҷоми Осиё - 2024 бо дастаи мунтахаби Ҷопон барору муваффақият таманно дорем”.

Ёдовар мешавем, ки дастаи мунтахаби ҷавонони Узбeкистон дар даври ниманиҳоии Ҷоми Осиё миёни ҷавонони то 23-сола бар мунтахаби Индонезия пирӯз шуда, барои аввалин бор дар таърих ба Бозиҳои олимпӣ роҳхат гирифт. Бозӣ 29-уми апрел баргузор шуда, бо ҳисоби 2:0 ба фоидаи тими ҷавонони Узбекистон анҷом ёфт.