5 март Давлаталӣ Саид, раиси вилояти Хатлон бо ҷудокори ҷавони кишвар Абдуллои Ориф мулоқот намуда, ӯро барои пирӯзӣ дар мусобиқаи байналмилалӣ шодбош гуфт.

Дар ин бора аз хадамоти матбуоти раиси вилоят хабар дода, менависанд, ки ба Абдуллои Ориф ҳамчунин 20 ҳазор сомонӣ мукофоти пулӣ тақдим шудааст.

Абдуллои Ориф, ки дастпарвари Мактаби махсуси варзишии вилояти Хатлон оид ба намудҳои гӯштини ба номи Саймуъмин Раҳимов дар шаҳри Кӯлоб мебошад, дар вазни то 73 кг дар мусобиқаи бонуфузи Tashkent Grand Slam 2026, ки дар шаҳри Тошкент баргузор шуд, ҳамаи рақибонашро мағлуб карда, соҳиби медали тилло гардид.

Дар ҳамин мусобиқа варзишгари дигари тоҷик Нуралии Эмомалӣ низ медали биринҷӣ ба даст овард. Дастоварди варзишгарони кишвар ҳамчун қадами муҳим дар роҳи таҳкими мавқеи варзиши тоҷик дар арсаи байналмилалӣ арзёбӣ мегардад.

Яҳё МАҲМАДНАБИЕВ, “ҶТ”