Варзишгарони тоҷик дар рӯзи аввали мусобиқаи байналмилалии ҷудо Dushanbe Grand Slam 2024, ки дар Қасри теннис ва маҷмааи варзишҳои обии шаҳри Душанбе ҷараён дорад, се медал (як тилло, як нуқра ва як биринҷӣ) ба даст оварданд.

Дар рӯзи аввали мусобиқа қувваозмоиҳо дар вазнҳои -48 кг, -52 кг, -57 кг миёни занон; -60 кг, -66 кг байни мардон баргузор шуд. Дар мусобиқаи занон варзишгарони тоҷик Райҳона Розиқзода (48 кг), Мадина Қурбонзода, Аҳлия Муъминова, Насиба Карликова (дар вазни -52 кг), Фазилат Гулбоева ва Раҳмия Ханҷарбекова (дар вазни -57 кг) дар нахустин рақобати худ шикаст хӯрданд.

Дар рақобатҳо миёни мардон дар рӯзи аввал Тоҷикистонро Меҳрзод Сӯфиев, Муҳаммадсолеҳ Қувватов, Ҳақдод Гулов, Муҳаммад Маҳмадизода (дар вазни то 60 кг); Обид Ҷебов, Муллораҷаб Халифаев, Ёсин Бобокалонов, Муқтадири Бобоҷон (дар вазни то 66 кг) намояндагӣ карданд. Аз байни онҳо се нафар ба гирифтани медал мушарраф шуданд.

Муҳаммадсолеҳ Қувватов дар вазни то 60 кило пас аз чаҳор пирӯзӣ бар рақибонаш аз Ҳиндустон, Русия, Португалия ва Ҷопон ба финал баромад. Қувватови 22-сола дар қавваозмоии ниҳоӣ бар Мажҳан Шамшоддини 27-солаи қазоқ дастболо шуда, бо медали тилло ва ҷоизаи молӣ ба маблағи 5 ҳазор евро мукофотонида шуд.

Обид Ҷебов, ки дар вазни то 66 кило дар даври аввал озод буд, дар даврҳои баъдӣ бо шикаст додани рақибонаш аз Муғулистон, Қазоқистон ва Узбекистон ба финал роҳ ёфт. Ин паҳлавони 26-солаи тоҷик дар даври ниҳоӣ аз гуштигири 20-солаи Туркманистон Сардор Раҳимов мағлуб шуда, бо медали нуқра ва 3 ҳазор евро сарфароз гашт.

Муллораҷаб Халифаеви 25-сола дар вазни то 66 кило барои медали биринҷӣ ба Абдураҳим Нутфуллоеви 22-солаи узбекистонӣ ғолиб омада соҳиби медали биринҷӣ гардид.

Баъди натиҷагирии рӯзи аввали мусобиқа дастаи Тоҷикистон ба касби як медали тилло, як нуқра ва як медали биринҷӣ, инчунин як ҷойи панҷум дар ҳисоби умумидастаӣ пешсаф аст.

Дар рӯзи дуюми мусобиқа 4-уми май - қувваозмоиҳо дар вазнҳои -63 кг, -70 кг миёни занон; -73 кг, -81 кг байни мардон доир мегардад.

Тоҷикистонро дар мусобиқаи занон Шоҳида Қаландарова, Ҷонона Назарова (ҳарду дар вазни -63 кг) ва Мавлуда Одинаева (-70 кг) муаррифӣ мекунанд.

Шоҳида Қаландарова дар даври аввал бо Кристина Кабана Переси испанӣ, Ҷонона Назарова бо Агаза Счмидти олмонӣ ва Мавлуда Одинаева бо Габриелла Виллямси фаронсавӣ рақобат хоҳанд кард.

Дар мусобиқаи мардон бошад, Беҳрӯз Хоҷазода, Абубакр Шеров, Маҳмадшариф Наҷмуддинов, Муҳаммадраҳим Сарахонов (дар вазни -73 кг); Сайфиддин Сайфиддинзода, Суннатулло Лоиқов, Суннатулло Мӯсоев, Раҳматуллобек Фарҳодов (дар вазни -81 кг) рақобат мекунанд.

Беҳрӯзи Хоҷазода, ки дар даври аввал озод аст, дар даври дуюм бо Биаслан Блимготови баҳрайнӣ қувваозмоӣ хоҳад кард. Рақиби Абубакр Шеров дар даври аввал Рамазон Коҷакови баҳрайнӣ мебошад. Муҳаммадшариф Наҷмиддинов дар даври аввал озод буда, дар даври дуюм бо Як Йонезукаи амрикоӣ рӯбарӯ мешавад. Муҳаммадраҳим Сарахонов, ки дар даври аввал озод аст, дар даври дуюм бо Адам Содолскии лаҳистонӣ нерӯсанҷӣ мекунад. Рақиби Раҳматуллобек Фарҳодов дар даври дуюм Адам Копески аз Чехия мебошад.

Суннатулло Мусоев дар даври аввал озод буда, дар даври дуюм бо ҷудокори қазоқ Жубаназар Абулайхан қувва меозмояд. Суннатулло Лоиқов бо Йошито Ҳоҷо аз Ҷопон дар даври дуюм қувваозмоӣ мекунад. Сайфиддин Сайфиддинзода бо Лачлан Мурҳеад аз Британияи Кабир дар даври дуюм ба рақобат мепардозад.

Ёдовар мешавем, ки дар мусобиқаи Dushanbe Grand Slam 390 варзишгар (204 мард ва 186 зан) аз 65 кишвари панҷ қораи ҷаҳон иштирок доранд.

Дар байни онҳо дурахшонтарин ситораи ҷудои дунё Тедди Ринери 35-сола аз Фаронса, ки қаҳрамони секаратаи олимпӣ ва 12-каратаи ҷаҳон мебошад, дар вазни беш аз 100 кило дар рӯзи охирини мусобиқа – 5-уми май - рақобат хоҳад кард.