Имрӯз дар доираи баругзории мусобиқаи байналмилалии “Dushanbe Grand Slam 2024”, ки аз 3 то 5 май дар Қасри теннис ва маҷмааи варзишҳои обии шаҳри Душанбе идома ёфтаистодааст, вазири саноат ва технологияҳои нави Ҷумҳурии Тоҷикистон Шералӣ Кабир ва Президенти Федератсияи ҷудои Тоҷикистон Исмоил Маҳмадзоир бо мудири кулли Федератсияи байналмилалии ҷудо Влад Маринеску мулоқот кардаанд.

Дар ин бора АМИТ “Ховар” бо истинод ба Вазорати саноат ва технологияҳои нави ҷумҳурӣ иттилоъ дод.

Ба иттилои манбаъ ҷонибҳо доир ба имконияти рушди ҷудо дар Тоҷикистон табодули андеша намуда, аҳамияти амалисозиву ҷорӣ намудани технологияҳои нав дар иншооти варзишии мамлакат мутобиқ ба талаботи энергияи “сабз” ва танзими мусобиқаҳои сайри ҷаҳонии ҷудо “Grand Slam”-ро дар Ҷумҳурии Тоҷикистон дар ҳамкорӣ бо Федератсияи байналмилалии ҷудо бо иштироки фаъоли корхонаҳои саноатии ватанӣ таъкид намуданд.