Дар вилояти Суғд бахшида ба Ҷашни 35-солагии Истиқлоли давлатии Ҷумҳурии Тоҷикистон таҳти унвони “35 соли Истиқлол-35 қуллаи варзишӣ” мусобиқаҳои кушоди вилоятӣ барои дарёфти Ҷоми раиси вилояти Суғд баргузор мегардад.

Дар ин бора аз Раёсати кор бо ҷавонон ва варзиши вилояти Суғд иттилоъ дода, илова намуданд, ки 35 мусобиқаи кушоди вилоятӣ бо ҳадафи тарғибу ташвиқи намудҳои варзиш, мустаҳкам намудани алоқаи дӯстӣ байни варзишгарон, баланд бардоштани маҳорати касбии варзишгарон, тарбияи насли наврас дар руҳияи эҳтиром ва арҷгузорӣ ба таъриху анъанаҳои миллӣ, инчунин, тарғиби тарзи ҳаёти солим ва муайян намудани дастаҳои мунтахаби вилояти Суғд роҳандозӣ шудааст.

Баргузории мусобиқаҳои кушоди вилоятӣ аз рӯи 35 намуд, аз ҷумла оид ба намудҳои тенниси рӯи миз, шоҳмот, велосипедронӣ, баскетбол, шиноварӣ, варзиши сабук, камонварӣ, вазнбардорӣ, гӯштини юнонӣ-румӣ, гӯштини кураш ва монанди ин давоми моҳҳои август-сентябри соли равон дар шаҳру ноҳияҳо дар назар дошта шудааст.

Гуфта мешавад, ки ғолибону ҷоизадорони намудҳои варзиш дар алоҳидагӣ ва дастаи ғолиб бо медал, ҷом, диплом, мукофотҳои пулӣ ва туҳфаҳои хотиравии Мақомоти иҷроияи ҳокимияти давлатии вилояти Суғд сарфароз гардонида мешаванд.

С. ҚОДИРОВ, “ҶТ”