Рустам Мирзозода, Раиси Суди Олии Ҷумҳурии Тоҷикистон имрӯз - 21 июл дар нишасти матбуоти хабар дод, ки дар шаш моҳаи аввали соли равон судҳои кишвар дар марҳилаҳои якум, кассатсионӣ ва назоратӣ дар маҷмуъ 80 ҳазору 193 парванда ва маводи гуногунро баррасӣ кардаанд.

Ба гуфтаи ӯ, ин нишондиҳанда нисбат ба ҳамин давраи соли гузашта 6 ҳазору 401 адад бештар аст.

Аз шумораи умумии парвандаҳои баррасишуда 8 ҳазору 438 адад парвандаҳои гражданӣ, 20 ҳазору 785 адад парвандаҳои оилавӣ, 6 ҳазору 495 адад парвандаҳои ҷиноятӣ, 31 ҳазору 496 адад парвандаҳои ҳуқуқвайронкунии маъмурӣ, 4 ҳазору 519 дархости мақомоти тафтиши пешакӣ ва 3 ҳазору 957 пешниҳоди сохтору мақомоти дахлдорро ташкил додаанд.

Таҳлилҳо нишон медиҳанд, ки нисбат ба нимсолаи якуми соли 2025 шумораи парвандаҳои гражданӣ 977 адад, парвандаҳои оилавӣ 102 адад ва парвандаҳои ҳуқуқвайронкунии маъмурӣ 4 ҳазору 431 адад афзоиш ёфтааст. Дар ҳамин ҳол, шумораи парвандаҳои ҷиноятӣ 134 адад коҳиш ёфтааст.

Дар нишасти матбуотӣ, ҳамчунин, дар бораи баррасии парвандаҳои вобаста ба риояи қонунгузорӣ дар самти танзими ҷашну маросим ва масъулияти падару модар маълумот дода шуд.

Ба гуфтаи мақомоти судӣ, барои риоя накардани талаботи Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” 630 парвандаи ҳуқуқвайронкунии маъмурӣ нисбати 704 нафар баррасӣ шуда, нисбати ҳамаи онҳо ба маблағи умумии 5 миллиону 97 ҳазору 96 сомонӣ ҷарима таъин гардидааст.

Ҳамзамон, дар доираи Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” 8 ҳазору 392 парвандаи ҳуқуқвайронкунии маъмурӣ баррасӣ шуда, нисбати 7 ҳазору 224 нафар ба маблағи умумии 5 миллиону 731 ҳазору 318 сомонӣ ҷарима таъин шудааст.

Яҳё МАҲМАДНАБИЕВ, “ҶТ”