Дар шаш моҳи соли равон 94 ҳолати интиқоли ғайриқонунии молҳои зераксизӣ ошкор гардидаанд. Ин шумора дар ҳамин давраи соли гузашта 134 ададро ташкил медод. Аз ҷумла дар нимсолаи аввали соли ҷорӣ 3 ҳолати интиқоли ғайриқонунии маҳсулоти спиртӣ, 44 ҳолати маҳсулоти тамоку, 23 ҳолат нӯшокиҳои қувватбахш, нӯшокиҳои газнок, воситаи нақлиёти сабукрав ва резинчархаҳо ошкор шудаанд.

Дар ин бора Хуршед Каримзода, сардори Хадамоти гумруки назди Ҳукумати Ҷумҳурии Тоҷикистон имрӯз - 21 июл зимни нишасти хабарӣ иттилоъ дод.

Ҳамчунин, гуфта шуд, ки дар ин давра дар натиҷаи амалисозии корҳои оперативӣ 4 ҳолати интиқол ва гардиши ғайриқонунии маводҳои нашъаовари навъи "ҳероин" ба миқдори 565 гр, навъи "ҳашиш" ба миқдори 9,28 гр ва "афюн" ба миқдори 1 кг 96 гр ба қайд гирифта шудааст.

Гуфта шуд, ки дар ин давра 3 ҳолати воридоти маҳсулоти пастсифат, 2 ҳолати интиқоли ғайриқонунии телефонҳои мобилӣ ба миқдори 33 адад, 29 ҳолати интиқоли ғайриқонунии асъори хориҷӣ ба маблағи 408 320 доллари ИМА низ ошкор гардидааст.

Сайёраи ҚИЁМИДДИН, “ҶТ”