Намояндаи Ваколатдор оид ба ҳуқуқи инсон дар Ҷумҳурии Тоҷикистон зӯроварӣ нисбати кӯдаконро дар кишвар нигаронкунанда хонда, зикр намуд, ки чунин ҳолатҳо сол аз сол меафзоянд.

Суҳайлӣ Қодирӣ, сардори шуъбаи ҳифзи давлатии ҳуқуқҳои кӯдаки дастгоҳи Ваколатдор оид ба ҳуқуқи инсон дар Ҷумҳурии Тоҷикистон имрӯз зимни нишасти матбуотӣ баён дошт, ки мутаассифона соли 2024 омори муроҷиатҳои зӯроварӣ нисбати кӯдакон зиёд шудааст.

- Дар ин сол мо 8 муроҷиати хаттӣ ва 6 муроҷиати шифоҳӣ дорем, ки шаҳрвандон бинобар ҷой доштани эҳтимолияти истифодаи зӯроварӣ ё таҳдиди истифодаи зӯроварӣ нисбати кӯдак муроҷиат кардаанд. Дар қиёс ба соли 2023 чунин муроҷиатҳо қариб якуним баробар зиёд гардидааст,-гуфт ӯ.

Ҳамзамон С. Қодирӣ вобаста ба наворҳои зӯроварӣ ба кӯдакон, ки чанд моҳи охир дар шабакаҳои иҷтимоӣ чарх мезанад, изҳори назар карда, гуфт гумонбарони ин ҳодисаҳо дар боздоштгоҳ қарор дошта, нисбаташон парванди ҷиноӣ боз шудааст.

Ба гуфтаи ин намояндаи Ваколатдор оид ба ҳуқуқи инсон, айни замон дар якҷоягӣ бо Прокуратураи Ҷумҳурии Тоҷикистон як гурӯҳи бисёр ҷиддӣ ташкил шудааст, ки мубориза бо чунин ҳолатҳо пурзӯртар мегарданд.

Фарзонаи УМАРАЛӢ, “ҶТ”