Бо дарназардошти талаботи Стратегияи миллии рушди Ҷумҳурии Тоҷикистон то соли 2030, фурудгоҳи Душанбе дар самти беҳтар намудани сатҳу сифати хизматрасонӣ, баланд бардоштани имкониятҳои техникиву истеҳсолӣ ва ҷорӣ намудани технологияҳои инноватсионӣ корҳои назаррасро амалӣ намудааст.

Яке аз дастовардҳои муҳими давраи охир азнавсозии инфрасохтори фурудгоҳ мебошад. Дар ин хусус имрӯз 9 июл Ҳабибулло Назарзода, директори Агентии авиатсияи гражданӣ, зимни нишасти хабарӣ иттилоъ дод.

Аз моҳи майи соли 2025 то семоҳаи аввали соли ҷорӣ дар фурудгоҳ 48 адад мошину механизмҳои нав харидорӣ шуданд, ки 29 адади онҳо техникаҳои муосири барқӣ ва рақамӣ буда, ба талаботи экологӣ ва стандартҳои байналмилалӣ ҷавобгӯ мебошанд.

Инчунин, зикр гардид, ки барои қабули ҳавопаймоҳои калонҳаҷми категорияи “С” панҷ таваққуфгоҳи нав бунёд гардида, зиёда аз 400 ҳазор метри мураббаъ роҳҳо бо асфалти махсуси аэродромӣ азнавсозӣ шуданд.

Фурудгоҳ бо дастгоҳҳои муосири муоинаи бағоҷ ва мусофирон таъмин гардидааст. Аз ҷумла, 8 адад дастгоҳи муоинаи бағоҷ, 13 адад дастгоҳи муоинаи бадани мусофирон, 6 адад таҷҳизоти муайянсозии буғҳои маводҳои тарканда ва 6 адад томографҳои муоинаи бағоҷ харидорӣ карда шуданд.

Қайд гардид, ки бартарии муҳими ин таҷҳизот дар он аст, ки онҳо дар заминаи зеҳни сунъи фаъолият намуда, зиёда аз 300 намуди ашё ва маводҳои мамнуъ, аз ҷумла яроқ, маводи мухаддир, металҳои қимматбаҳо ва асъорро ба таври автоматӣ муайян месозанд, ки сатҳи амният ва эътимоднокии фаъолияти фурудгоҳро баланд мебардорад.

Шаҳноза АЗИМОВА, “ҶТ”