8 июл вазири нақлиёти Ҷумҳурии Тоҷикистон Азим Иброҳим зимни нишасти матбуотӣ ба хабарнигорон иттилоъ дод, ки айни замон дар кишвар 920 хатсайри мусофирбарӣ фаъолият мекунад. Аз ин шумора 187 хатсайри шаҳрӣ, 541 хатсайри наздишаҳрӣ, 159 хатсайри байнишаҳрӣ ва 33 хатсайри байналмилалӣ мебошанд. Ба гуфтаи вазир, нисбат ба ҳамин давраи соли гузашта шумораи хатсайрҳои мусофирбарӣ 18 адад зиёд шудааст.

Ба иттилои ӯ, то 1 январи соли 2026 тибқи маълумоти Бозрасии давлатии автомобилӣ ва Хадамоти давлатии назорат ва танзими нақлиёт дар ҷумҳурӣ 800 926 воситаи нақлиёт ба қайд гирифта шудааст. Аз ҷумла, 680 ҳазору 296 автомашинаи сабукрав, 66 667 нақлиёти боркаш, 17 700 нақлиёти мусофирбар, 29 792 мотосикл, 6084 ядак ва 1 423 нимядак мебошанд.

Зикр гардид, ки шумораи воситаҳои нақлиёти ба қайд гирифташуда нисбат ба соли гузашта 99 ҳазору 731 адад ё 14,2 фоиз афзудааст. Аз ин шумора 67 ҳазору 230 воситаи нақлиёт, ё тақрибан 8,8 фоиз, дар соҳаҳои иқтисодиёти кишвар фаъолият мекунанд.

Ҳамчунин, тибқи маълумоти Агентии омори назди Президенти Ҷумҳурии Тоҷикистон, дар давраи ҳисоботӣ тавассути ҳамаи намудҳои нақлиёт 76,4 миллион тонна бор бо гардиши 8 миллиард тонна-километр ва 552,1 миллион мусофир бо гардиши 8,2 миллиард мусофир-километр интиқол дода шудааст. Нисбат ба ҳамин давраи соли гузашта ҳаҷми боркашонӣ 14,7 фоиз, гардиши бор 17,5 фоиз, мусофирбарӣ 8 фоиз ва гардиши мусофирон 9,1 фоиз афзоиш ёфтааст.