Вазорати энергетика ва захираҳои оби Ҷумҳурии Тоҷикистон иттилоъ медиҳад, ки дар кишвар соли 2024 воридоти гази моеи табиӣ зиёд гардидааст.

Имрӯз зимни нишасти хабарӣ Далер Ҷумъа, вазири энергетика ва захираҳои оби кишвар гуфт, ки дар давраи ҳисоботӣ воридоти гази табиӣ аз Ҷумҳурии Узбекистон ба Ҷумҳурии Тоҷикистон 267 млн. м³-ро ташкил дод, ки ин нисбати соли гузашта 47, 1 млн. м³ ё 21, 4% зиёд мебошад.

Ҳамзамон, ба гуфтаи ӯ дар соли 2024 истихроҷи нафт дар кишвар 16 ҳазору 136,9 тонна ва гази табиӣ бошад, 362,4 ҳазор м³-ро ташкил дод.

Зикр гардид, ки соли 2024 аз ҳисоби соҳибкорон ва ҷамъиятҳои ватанӣ маҳсулоти нафтӣ ва гази моеъ аз ҳамаи давлатҳо ба Ҷумҳурии Тоҷикистон дар ҳаҷми 1 млн. 541,3 ҳазор тонна ворид гардидааст, ки нисбати соли 2023, дар ҳаҷми 128, 8 тонна ё 9,1% зиёд мебошад.

Фарзонаи УМАРАЛӢ, “ҶТ”